မိုင်းရူပ၊ မေလ ၅ ရက်၊ ဟိုပန်
ဝပြည်သွေးစည်းညီညွတ်ရေးတပ်မတော် UWSA ထိန်းချုပ်ထားတဲ့ ရှမ်းမြောက် ဟိုပန်မြို့ရှိ ဖောင်ဆိပ်တံတားနဲ့ ညီနောင်တံတားမှာ ဗမာလူမျိုးတွေကို ဖြတ်သန်းခွင့် ပြန်ပေးပြီလို့ မြေပြင်အခြေအနေသိရှိသူ အမျိုးသမီးတစ်ဦးက ရွှေဖီမြေကို ပြောပါတယ်။
ရှမ်းမြောက် လားရှိုးမြို့ကို ကိုးကန့်တပ်မတော် MNDAA က စစ်ကောင်စီထံ ပြန်လွှဲပေးစဥ် ပြီးခဲ့တဲ့ ဧပြီ ၂၃ ရက်ကစပြီး ကိုးကန့်ဒေသနဲ့ ဝဒေသကို ဆက်သွယ်ထားတဲ့ ဖောင်ဆိပ်တံတားနဲ့ ညီနောင်တံတားမှာ UWSA ဘက်က ဖြတ်သန်းပိတ်ပင်ထားတာ ဖြစ်ပါတယ်။
ဖြတ်သန်းသွားလာခွင့်ကို မနေ့ မေလ ၄ ရက်မှာ ပြန်လည်ခွင့်ပြုခဲ့တာဖြစ်ပြီး ကိုးကန့်တပ် MNDAA ထိန်းချုပ်ထားတဲ့ ကွမ်းလုံ၊ ချင်းရွှေဟော်နဲ့ လောက်ကိုင်မြို့တွေမှာတော့ အထွက်ကို လူမျိုးတိုင်းခွင့်ပြုပေမယ့် အဝင်ကိုတော့ ဗမာလူမျိုးဝင်ရောက်ခွင့် ကန့်သတ်ထားတယ်လို့ ကွမ်းလုံနဲ့ ဟိုပန်မှာ ဖြတ်သန်းသွားလာနေတဲ့ အမျိုးသမီးတစ်ဦးက ရွှေဖီမြေကို ပြောပါတယ်။
“ဝဘက်ကတော့ ဖြတ်သန်းခွင့်ပေးပြီရှင့်။ ကိုးကန့်ကတော့ အဝင်ပိတ်ထားတုန်း။ အထွက်တော့ ကြိုက်တဲ့လူမျိုးထွက်ရတယ်ရှင့်” လို့ ဆိုပါတယ်။
လားရှိုးကို စစ်ကောင်စီတပ်ထံ ပြန်လည်လွှဲပြောင်းချိန် လုံခြုံရေးစိုးရိမ်ချက်ကြောင့် ဗမာလူမျိုးတွေကို ဖြတ်သန်းသွားလာခွင့် ပိတ်ပင်တာဖြစ်နိုင်တယ်လို့ သူမက ဆက်ပြောပါတယ်။
လားရှိုးကို စစ်ကောင်စီထံ ပြန်ပေးပြီးနောက် ကိုးကန့်တပ်ဘက်ကလည်း ၎င်းတို့ ထိန်းချုပ်ထားတဲ့ ရှမ်းမြောက် ကွမ်းလုံ၊ ချင်းရွှေဟော်နဲ့ လောက်ကိုင်မြို့တွေမှာရှိတဲ့ ဗမာလူမျိုးအပါအဝင် နေထိုင်ခွင့် သက်တမ်းပြည့်သူတွေကို နေရပ်ပြန်ပို့တာတွေ ပြုလုပ်ခဲ့ပါတယ်။
