မိုင်းရူပ၊ မေလ ၄ ရက်
တရုတ်နိုင်ငံရဲ့ ကြားဝင်မှုကြောင့် စစ်ကောင်စီနဲ့ ဆွေးနွေးပွဲမှာ တအာင်းတပ်မတော်- PSLF/TNLA ဘက်က နယ်မြေသတ်မှတ်ရေး ဆွေးနွေးခဲ့တာ မရှိဘူးလို့ PSLF/TNLA ရဲ့ အထွေထွေအတွင်းရေးမှူး ၂ ဗိုလ်မှူးကြီး တားပန်လက ပြောပါတယ်။
“ဆွေးနွေးပွဲမှာ ကျနော်တို့ ဘယ်နေရာက တအာင်းနယ်မြေ ဆွေးနွေးခဲ့တာ မရှိဘူး။ ကျနော်တို့ တာဝန်ယူထားတဲ့ မြို့နယ်တွေမှာ လူထုတွေ စစ်ပွဲဘေးဒဏ်ကနေမှ ကင်းလွတ်အောင် စားဝတ်နေရေး ပြေလည်လာအောင် ဦးတည်ပြီးတော့မှ ဆွေးနွေးခဲ့တာ ဖြစ်ပါတယ်” လို့ ဗိုလ်မှူးကြီး တားပန်လက ဒီနေ့ မေလ ၄ ရက်မှာ ပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။
စစ်ကောင်စီနဲ့ ဆွေးနွေးပွဲမှာ နှစ်ဖက်တပ်တွေ ရောက်တဲ့နေရာကနေ အပစ်ရပ်ဖို့၊ လေကြောင်း၊ လက်နက်ကြီးနဲ့ ဒရုန်းအသုံးပြုပြီး တိုက်ခိုက်တာတွေရပ်ဖို့နဲ့ လူထုတွေကို လွတ်လပ်စွာ သွားလာခွင့်ပြုဖို့ကိုသာ တအာင်းတပ်ဘက်က ဆွေးနွေးခဲ့တယ်လို့ တားပန်လက ပြောပါတယ်။
ဒါ့အပြင် ထိန်းချုပ်နယ်မြေကို စစ်ကောင်စီက ပြန်ပေးဖို့ တောင်းဆိုချက်ကို TNLA က လက်ရှိအချိန်ထိ လက်ခံတာ မရှိသေးဘူးလို့ ဗိုလ်မှူးကြီး တားပန်လက ဆိုပါတယ်။
တရုတ်ရဲ့ ကြားဝင်စေ့စပ်မှုကြောင့် ဧပြီ ၂၈ နဲ့ ၂၉ ရက်မှာ စစ်ကောင်စီနဲ့ PSLF/TNLA တို့ တရုတ်နိုင်ငံ ကူမင်းမြို့မှာ တွေ့ဆုံခဲ့ပြီးနောက် TNLA ထိန်းချုပ်ထားတဲ့ နောင်ချို၊ ကျောက်မဲ၊ သီပေါ၊ မိုးကုတ်၊ မိုးမိတ်ကနေ ဆုတ်ပေးဖို့ စစ်ကောင်စီက တောင်းဆိုခဲ့ပါတယ်။
စစ်ကောင်စီရဲ့ တောင်းဆိုချက်ကို တအာင်းတပ်ဘက်က လက်မခံတာကြောင့် စစ်တပ်က PSLF/TNLA ထိန်းချုပ်ထားတဲ့ နောင်ချိုနဲ့ မိုးကုတ်မြို့နယ်ထဲ ဒီရက်ပိုင်းမှာ လေယာဉ်နဲ့ ဗုံးဆက်တိုက် ကြဲနေပါတယ်။
