မိုင်းရူပ၊ မေလ ၁ ရက်၊ သီပေါ
ရှမ်းပြည်တိုးတက်ရေးပါတီ-SSPP နဲ့ ကိုးကန့်တပ်မတော်-MNDAA တို့အကြား ပစ်ခတ်မှုဖြစ်ပွားခဲ့တဲ့ သီပေါမြို့နယ် နမ့်မအုပ်စုထဲက ကိုးကန့်တပ်ဘက်က ၎င်းတို့ထောင်ထားတဲ့ အလံတွေပြန်ဖြုတ်ပေးခဲ့တယ်လို့ စစ်ရေးသတင်းအရင်းမြစ်တစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဧပြီ ၂၉ ရက်မှာ သီပေါနဲ့ လားရှိုးကြားရှိ နမ့်မကျေးရွာအုပ်စုထဲမှာရှိတဲ့ SSPP တပ်တွေကို MNDAA ဘက်က တပ်ဆုတ်ပေးဖို့ ညှိနှိုင်းရာကနေ ပစ်ခတ်မှုတွေ ဖြစ်ပွားခဲ့တာ ဖြစ်ပါတယ်။
“ကိုးကန့်တွေက ဒီနေ့(မေလ ၁ ရက်) မနက်အစောကြီး နမ့်မမှာ ထောင်ထားတဲ့အလံတွေ ပြန်ဖြုတ်ပေးတယ်။ လူကတော့ ပြန်ဆုတ်မယ်လို့ ကြားတယ်။ အခုထိတော့ မဆုတ်သေးဘူး” ဒီဖြစ်စဥ်ကို သိရှိထားတဲ့ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဧပြီ ၂၈ ရက်နဲ့ ၂၉ ရက်မှာ MNDAA နဲ့ ၎င်းတို့တပ်အကြား ထိတွေ့မှု ၈ နေရာ၊ ၂ ဖက်ထိုးကြိတ်မှု ၂၄ နေရာအထိရှိခဲ့ပြီး ၂ ဖက်တပ်ဖွဲ့ဝင်တွေ ထိခိုက်ဒဏ်ရာရခဲ့တယ်လို့ SSPP ကထုတ်ပြန်ထားပါတယ်။
နှစ်ဖက်တပ်ရဲ့ စစ်ရေးတင်းမာမှုတွေကို ဗဟိုခေါင်းဆောင်တွေ တွေ့ဆုံဆွေးနွေးဖြေရှင်းသွားမှာ ဖြစ်တယ်လို့ SSPP က ဆိုပါတယ်။
SSPPနဲ့ ကိုးကန့်တပ်ဟာ “ဝ”တပ်-UWSA ဦးဆောင်တဲ့ ပြည်ထောင်စုနိုင်ငံရေး ဆွေးနွေးညှိနှိုင်းမှုကော်မတီ-FPNCC ရဲ့ အဖွဲ့ဝင်တွေ ဖြစ်ကြပြီး
ရှမ်းမြောက်မှာ ၁၀၂၇ စစ်ဆင်ရေးနောက်ပိုင်း တိုင်းရင်းသားလက်နက်ကိုင်အကြား နယ်မြေအငြင်းပွားမှု မကြာခဏဖြစ်ပွားနေပါတယ်။
