မိုင်းရူပ၊ မေလ ၁ ရက်၊ ပန်ဆိုင်း
ရှမ်းမြောက် တရုတ်-မြန်မာနယ်စပ် မူဆယ်မြို့နယ် ပန်ဆိုင်း(ကြူကုတ်)နယ်စပ်ရှိ ကိုးကန့်တပ်မတော်- MNDAA ရဲ့ အလံကို ဖြုတ်ချပြီး မြန်မာနိုင်ငံအလံ ပြန်လွှင့်ထူခဲ့တယ်လို့ ရွှေဖီမြေက စုံစမ်းသိရှိရပါတယ်။
ပန်ဆိုင်း(ကြူကုတ်) နယ်စပ်ဂိတ်မှာ လွှင့်ထူထားတဲ့ ကိုးကန့်တပ်ရဲ့အလံကို မနေ့ ဧပြီ ၃၀ ရက်မှာ ဖြုတ်ချပြီး မြန်မာနိုင်ငံအလံကို ပြန်တင်ခဲ့တာ ဖြစ်ပါတယ်။
“ကျနော်တို့ ပန်ဆိုင်း ရောက်တဲ့အချိန်မှာ အထူးဒေသအလံနဲ့ ထောင်တာ တွေ့တယ်။ မြန်မာနိုင်ငံအလံကတော့ မနေ့ကပဲ ထောင်တာ” လို့ ၁၀၅ မိုင် ကုန်သွယ်ရေးနဲ့ နီးစပ်သူတစ်ဦးက ရွှေဖီမြေကို ပြောပါတယ်။
တရုတ်-မြန်မာ နယ်စပ်ကုန်သွယ်ရေးနဲ့ နီးစပ်သူတွေကတော့ ပန်ဆိုင်း(ကြူကုတ်) နယ်စပ်ဂိတ်မှာ ကုန်သွယ်မှု ပြန်လုပ်လာနိုင်တယ်လို့ သုံးသပ်ကြပါတယ်။
လက်ရှိမှာ ပန်ဆိုင်း(ကြူကုတ်) နယ်စပ်ဂိတ်မှာ ကုန်ပစ္စည်းတွေ သယ်ယူတာ မရှိသေးဘဲ လူအအဝင်အထွက်တော့ ပြုလုပ်တာ ရှိတယ်လို့ သိရပါတယ်။
ပန်ဆိုင်း(ကြူကုတ်)မြို့ကို MNDAA က ၁၀၂၇ စစ်ဆင်ရေး ပထမလှိုင်းအတွင်း တိုက်ခိုက်သိမ်းပိုက်ခဲ့တာပဲ ဖြစ်ပါတယ်။
ကိုးကန့်တပ် တိုက်ခိုက်သိမ်းပိုက်ခဲ့တဲ့ ရှမ်းမြောက် လားရှိုးမြို့ကို တရုတ်ရဲ့ ကြားဝင်စေ့စပ်မှုကြောင့် စစ်ကောင်စီထံ ပြန်လည်လွှဲပြောင်းပြီးနောက် တရုတ်-မြန်မာ ကုန်သွယ်ရေးတွေ ပြန်စနိုင်တယ်လို့လည်း သုံးသပ်မှု ရှိနေပါတယ်။
ညီနောင်မဟာမိတ် ၃ ဖွဲ့ ထိန်းချုပ်ထားတဲ့ ၁၀၅ မိုင် ကျင်စန်းကျော့ဂိတ်မှာတော့ စက်ပစ္စည်းကလွှဲပြီး ကျန်တဲ့ ကုန်ပစ္စည်းတွေကို တရုတ်ဘက်က သယ်ယူခွင့် ပေးထားတယ်လို့ သိရပါတယ်။
တရုတ်-မြန်မာ ကုန်သွယ်ရေးမှာ အဓိကကျတဲ့ ၁၀၅ မိုင် ကုန်သွယ်ရေးဇုန်အပါအဝင် ကြူကုတ်(ပန်ဆိုင်း)၊ ချင်းရွှေဟော် စတဲ့ နယ်စပ်ဂိတ်ကို ညီနောင်မဟာမိတ် ၃ ဖွဲ့က ၁၀၂၇ စစ်ဆင်ရေးကာလအတွင်း ထိန်းချုပ်နိုင်ခဲ့တာပဲ ဖြစ်ပါတယ်။
