မိုင်းရူပ၊ ဧပြီ ၃၀ ရက်၊ မိုးကုတ်
စစ်ကောင်စီရဲ့ အပစ်ရပ်သက်တမ်းပြည့်တဲ့ ဒီနေ့ ဧပြီ ၃၀ ရက် ည ၈ နာရီ ၂၅ မိနစ်မှာ တအာင်းတပ်မတော်-TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့အနောက်ပိုင်းကို စစ်ကောင်စီဗုံးကြဲတိုက်ခိုက်ခဲ့ပါတယ်။
“ကျနော်တို့နေတဲ့နေရာ ဖြတ်တာနဲ့ ကြဲသွားတယ်။ ဂျက်နဲ့ ၂ ကြိမ်ကြဲတာ။ ကျောက်လုပ်ကွက်ပဲ ဖြစ်ဖို့များတယ်။ နေရာအတိအကျတော့ မသိသေးဘူး” လို့ မိုးကုတ် ဒေသခံတစ်ဦးက ရွှေဖီမြေကို ပြောပါတယ်။
စစ်ကောင်စီရဲ့ ဗုံးကြဲတိုက်ခိုက်မှုကြောင့် ထိခိုက်မှု ရှိမရှိကိုတော့ ရွှေဖီမြေက ဆက်လက်စုံစမ်းနေဆဲ ဖြစ်ပါတယ်။
လက်ရှိဗုံးကြဲတဲ့နေရာဟာ သစ်စိမ့်ကုန်းရွာတစ်ဝိုက်ဖြစ်ပြီး ဗုံး ၂လုံးကြဲချသွားခဲ့တယ်လို့ ဒေသခံတွေ ပြောဆိုပေမယ့် ရွှေဖီမြေအနေနဲ့ အတည်ပြုနိုင်ဖို့ ကြိုးစားဆက်သွယ်နေဆဲ ဖြစ်ပါတယ်။
ပြီးခဲ့တဲ့ ဧပြီ ၁၇ ရက် နှစ်သစ်ကူးနေ့မှာလည်း TNLA ထိန်းချုပ်ထားတဲ့ မိုးကုတ်မြို့အရှေ့ပိုင်းကို စစ်ကောင်စီက ဗုံးကြဲတိုက်ခိုက်ခဲ့ပါတယ်။
ဒီနေ့ ဧပြီ ၃၀ ရက်ဟာ ငလျင်ကိုအကြောင်းပြုပြီး စစ်ကောင်စီဘက်က ယာယီအပစ်ရပ်ကြောင်း ကြေညာထားတဲ့ သက်တမ်းပြည့်တဲ့နေ့ဖြစ်ပါတယ်။
မိုးကုတ်မြို့ဟာ ၁၀၂၇ စစ်ဆင်ရေးဒုတိယလှိုင်းအတွင်း TNLA က တိုက်ခိုက်သိမ်းထားပြီး ၎င်းတို့ရဲ့ အုပ်ချုပ်ရေးယန္တရားတွေ လည်ပတ်နေတဲ့ မြို့ဖြစ်ပါတယ်။
