လွေးလာဝ်ဇာရ်၊ ဧပြီ ၃ဝ ရက်၊ မိုးမိတ်
ရှမ်းမြောက် မိုးမိတ်မြို့နယ်က မန်ဖွယ်ကျေးရွာမှာ တပ်စွဲထားတဲ့ ရှမ်းပြည်တိုးတက်ရေးပါတီ SSPP ရဲ့ တပ်သားတွေ အရက်မူးပြီး စကားများရန်ဖြစ်ရာကနေ အချင်းချင်း ပြန်လည်ပစ်ခတ်ပြီး ၅ ဦးသေဆုံးကာ ၁ ဦး ဒဏ်ရာရခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
မနေ့ ဧပြီလ ၂၉ ရက် ည ၇ နာရီဝန်းကျင်မှာ မန်ဖွယ်ရွာက ဝိုင်ဖိုင်ဖွင့်ထားတဲ့ နေအိမ်တစ်ခုမှာ အဲဒီအဖွဲ့တွေက အရက်သောက်ပြီး ဖဲရိုက်ရာကနေ ဖြစ်စဉ်ဖြစ်ပွားခဲ့တာလို့ ဆိုပါတယ်။
ဖြစ်စဉ်သိရှိသူ အမျိုးသားတစ်ဦးက “သူတို့အချင်းချင်းကြားဘဲ မူးပြီး ပြဿနာဖြစ်တာ။ အဲအိမ်မှာ လိုင်းရတော့ အရက်သောက် ဖဲရိုက်နေကြတာ။ အဲကနေ သေနတ်ပစ်တော့ ၅ ယောက် သေတယ်။ တစ်ယောက်က ဒဏ်ရာဘဲ ရတယ်” လို့ ပြောပါတယ်။
မန်ဖွယ်ရွာမှာ ဖြစ်ပွားခဲ့တဲ့ အဲဒီဖြစ်စဉ်ဟာ ဟုတ်မှန်ပေမယ့် ၎င်းတို့ အချင်းချင်းကြား ဖြစ်တဲ့ ပြဿနာတော့ မသိရဘူးလို့ နောက်ထပ်ဒေသခံတစ်ဦးက ရွှေဖီမြေကို ပြောပါတယ်။
“သူတို့ ရှမ်းစစ်သားအချင်းချင်းဘဲ လိုင်းသုံးရင်း စကားများပြီး အပြန်အလှန်ပစ်ခတ်တာ။ သူတို့အချင်းချင်းဆိုတော့ ဘာပြဿနာဖြစ်တာလည်းဆိုတာကို ကျနော်တို့လည်း မသိရဘူး”
ဧပြီလ ၂၈ ရက်မှာလည်း သီပေါမြို့နယ် နမ့်မကျေးရွာနဲ့ ကုန်းပေါင်းရွာရှိ SSPP တပ်နဲ့ ကိုးကန့်တပ် MNDAA တို့အကြား နယ်မြေအငြင်းပွားမှု ဖြစ်ပွားရာကနေ ပစ်ခတ်မှုဖြစ်ခဲ့ပြီး SSPP တပ်ဘက်က တပ်ဆုတ်ပေးခဲ့တယ်လို့ သိရပါတယ်။
