ယာရူစိင်၊ ဧပြီ ၃၀ ရက်၊ သိန္နီ
ကိုးကန့်တပ်- MNDAA ထိန်းချုပ်ထားတဲ့ သိန္နီမြို့မှာ ကုန်စည်တင်တဲ့ကားတွေကို ကိုးကန့်တပ်က ငွေသိန်း ကျပ် ၃၀ အထိ အခွန်ကောက်ခံနေကြောင်းကို ကိုယ်တိုင်ကြုံတွေ့ခဲ့ရသူ တစ်ဦးက ရွှေဖီမြေကို ပြောပါတယ်။
အရင်က သိန္နီမြို့အထွက် တိုးဂိတ်မှာ ကုန်စည်တင်တဲ့ ၁၂ ဘီးကား တစ်စီးကို ငွေကျပ် ၄ သိန်းကျော်သာ ပေးဆောင်ရပေမဲ့ လက်ရှိမှာတော့ ငွေ ၄ သိန်း ကနေ ငွေသိန်း ၃၀ ကျော်အထိ ကောက်ခံနေကြောင့် အခက်တွေ့နေရတယ်လို့ ပြောပါတယ်။
“ကုန်စုံတင်တဲ့ကားဆိုတော့ ကားပေါ်က တင်လာတဲ့ စာရွက်စာတမ်းတွေ တောင်းပြီတော့ အခွန်ကောက်တာပေါ့။ ၄ သိန်းကျော်ပဲ အခွန်ပေးရမှာကိုး ဂိတ်စောင့်တပ်သားက ၅ နဲ့မြောက်တော့ သိန်း ၂၀ ကျော်လောက်ပေးလိုက်ရတယ်။ သိန်း ၂၀ တင်မကဘူး စုစုပေါင်း ကျနော် သိန်း ၃၀ အထိ ပေးလိုက်ရတယ်”လို့ ဆက်ပြောပါတယ်။
ကုန်တင်တဲ့ အိမ်စီးကားတွေလည်း ကိုးကန့်တပ်က တစ်စီးကို ၂ သိန်းကျော်ကနေ ၃ သိန်းအထိ အခွန်ကောက်ခံနေတယ်လို့ နောက်ထပ် ကိုယ်တိုင်အခွန်ပေးဆောင်ခဲ့ရသူ တစ်ဦးက ပြောပါတယ်။
“အိမ်စီးကားဆိုရင် မုန့်ပဲတင်လာတာကို သိန်းဂဏန်းလောက်ပေးရတာဆိုတော့ မတန်ဘူးလေ။ မုန့်ဖာတွေ အများကြီးတင်တာလဲ မဟုတ်ဘူး။ မုန့်ဖာတွေ နှစ်ဖာလောက်တင်ရင်လဲ ၃ သိန်းနီးပါးက အမြဲပေးနေရတယ်။ ဂိတ်စောင့်ကလဲ ဗမာစကား သိပ်မတတ်တော့ဘူး”
ကုန်စည်တင်ကားတွေကို အခွန်ဘယ်လောက်ပေးဆောင်ရမဲ့ဆိုတာလဲ တိကျတဲ့ သတ်မှတ်ထားတာမရှိတာကြောင့် အခွန်ကို ဂိတ်စောင့်တပ်သားတွေက ကောက်ချင်သလို ကောက်နေကြတယ်လို့ အထက်ပါသတင်းအရင်းအမြစ်က ဆက်ပြောပါတယ်။
ပြီးခဲ့တဲ့ မတ်လ ၃ ရက်ကလဲ သိန္နီမြို့အထွက် တိုးဂိတ်မှာ ဆီတင်တဲ့ ၁၂ဘီးကား တစ်စီးကို ကိုးကန့်တပ်က ကျပ်သိန်း ၉၀ နီးပါးအထိ ကောက်ခံခဲ့ဖူးပါတယ်။
