ခိုင်လေး၊ ဧပြီ ၃၀ ရက်၊ မတ္တရာ
မန္တလေးတိုင်း မတ္တရာမြို့နယ် စစ်ကောင်စီတပ်ရဲ့ မြကံသာ အထိုင်စခန်းကနေပြီးတော့ မတ္တရာအရှေ့ဘက်ခြမ်းကို လက်နက်ကြီးတွေနဲ့ ရမ်းသမ်း ပစ်ခတ်မှုကြောင့် ဒေသခံ ၁ ဦး သေဆုံးပြီး ၁ ဦး ဒဏ်ရာရခဲ့တယ်လို့ Voice of Mandalay မှ တာဝန်ရှိသူ တစ်ဦးက ရွှေဖီမြေကိုပြောပါတယ်။
မနေ့ ဧပြီ ၂၉ ရက် နေ့လည် ၁၂ နာရီဝန်းကျင်က စစ်ကောင်စီတပ်ရဲ့ ပစ်ခတ်လိုက်တဲ့ လက်နက်ကြီးကြောင့် အသက် ခန်မှန်း ၄၀ ကျော်ခန့်ရှိတဲ့ ဒေသခံတစ်ဦး ပွဲချင်းပြီးသေဆုံးခဲ့ပြီး နောက်တစ်ဦးမှာ ဒဏ်ရာပြင်းထန်တာကြောင့် အသက်အန္တရာယ် စိုးရိမ်ရတယ်လို့ ဆိုပါတယ်။
”နွားလွတ်တဲ့ချိန်ပေါ့။ ၁၁ ခွဲ ၁၂ ဝန်းကျင်လောက်မှာ လက်နက်ကြီး နဲ့ပစ်တာ အဲမှာ လူလည်းထိတယ်။ နွားတစ်ကောင်လည်းသေတယ်။ ဒဏ်ရာရတဲ့ တစ်ယောက်က အသက်လုနေရတဲ့အခြေအနေပါ။ မတ္တရာက စစ်တပ်အထိုင်စခန်းကနေပြီးတော့ ကျေးရွာတွေဘက်ကို လက်နက်ကြီးတွေနဲ့ ထုတာကတော့ နေ့တိုင်းပါဘဲ။ အခုက စစ်တပ်ကနေပြီးတော့ စစ်ကြောင်းထိုးဖို့ လုပ်နေတာတော့ရှိတယ်”
မတ္တရာ အရှေ့ဘက်ခြမ်းက ကျေးရွာတွေကို စစ်ကောင်စီတပ်က နေ့တိုင်း နီးပါးလက်နက်ကြီးတွေနဲ့ ပစ်ခတ်တာတွေရှိပြီး ဒေသခံတွေအနေနဲ့ အိုးအိမ်စွန့်ခွာ ထွက်သွားချင်သော်လည်း အိမ်မှာကျန်ရှိတဲ့ ပစ္စည်းတွေ အခိုးခံရမှာကို စိုးရိမ်တာကြောင့် အသက် အသေခံကာ ဆက်လက် နေထိုင်ရတာဖြစ်တယ်လို့ မတ္တရာဒေသခံတစ်ဦးက VOM ကိုပြောဆိုထားပါတယ်။
”လက်နက်ကြီး အမြဲပစ်နေတဲ့နေရာ ကိုယ့်အိုးအိမ်ကနေ ထွက်မသွားချင်ဘူးဆိုတာက အကြောင်းရှိလို့ပါ။ ထွက်ပြေးပြီးလို့ ပြန်လာရင် ဘာပစ္စည်းမှ ကျန်တော့မှာ မဟုတ်ဘူး။ အဲချိန်ကြရင် ဘယ်သူမှလည်း တာဝန်ယူကြတာ မဟုတ်ဘူး။ ပြည်သူတွေမှာ လက်နက်ကြီးရန်က ကြောက်ရ သူခိုးတွေရဲ့ရန်က ကြောက်ရဆိုတော့ မထူးဇာတ်ခင်းပြီး နေနေကြတာ ပါ” လို့ မတ္တရာဒေသခံက VOM ကို ပြောဆိုထားပါတယ်။
ပြီးခဲ့တဲ့ ဧပြီ ၂၇ ရက်နေ့ကလည်း မတ္တရာ အရှေ့ဘက်ခြမ်းက ရုံးပင်ရွာကို Jet Fighter တစ်စီးနဲ့ ပေါင် ၅၀၀ ဗုံးနှစ်လုံး ကြဲချတိုက်ခိုက်ခဲ့ရာ ရုံးပင်ရွာက တိုက်၂ လုံးပျက်စီးခဲ့ပြီး အမျိုးသမီး တစ်ဦး ထိခိုက်ဒဏ်ရာရရှိခဲ့ပါတယ်။
