အိုက်ပွီး၊ ဧပြီလ ၂၉ ရက်၊ ဖလမ်း
ချင်းတော်လှန်ရေးတပ်ဖွဲ့ ထိန်းချုပ်ထားတဲ့ ချင်းပြည်နယ်၊ ဖလမ်းမြို့နယ်၊ ဝေဘူလမြို့ကို စစ်ကောင်စီက လေကြောင်း ဗုံးကြဲတိုက်ခိုက်လို့ အရပ်သား ၆ ဦးထက်မနည်း ထိခိုက်ဒဏ်ရာရရှိခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။
ပြီးခဲ့တဲ့ ဧပြီလ ၂၇ ရက်နေ့၊ ည ၈ နာရီဝန်းကျင်မှာ စစ်ကောင်စီတပ်က ဝေဘူလမြို့ကို ဂျက်ဖိုက်တာတစ်စီးနဲ့ လေကြောင်း ဗုံးကြဲတိုက်ခိုက်မှု နှစ်ကြိမ်ပြုလုပ်သွားတာ ဖြစ်ပါတယ်။
“မြို့ထဲက ဘုရားကျောင်းအနီးအနား ဝန်းကျင်တဝိုက်မှာ ဗုံးကြဲချသွားတာပါ။ အရပ်သား ၆ ယောက်လောက်က ဒဏ်ရာရသွားတယ်။ ပြင်းထန်ဒဏ်ရာရတဲ့သူလည်းပါတယ်။ အခုလုံခြုံတဲ့နေရာမှာ ပြောင်းရွှေ့ထားပြီး ဆေးကုသမှုလုပ်နေပါတယ်။”လို့ ဝေဘူလမြို့ခံအမျိုးသားတစ်ဦးက ရွှေဖီမြေသို့ ပြောပါတယ်။
ဒါ့အပြင် အဲဒီလေကြောင်း ဗုံးကြဲတိုက်ခိုက်လို့ ဝေဘူလမြို့က ခရစ်ယာန်ဘုရားကျောင်းအပါအဝင် အဆောက်အဦး ၁၅ လုံးထက်မနည်း ပျက်စီးသွားတယ်လို့ သိရပါတယ်။
“ဘုရားကျောင်းက လုံးလုံး ပျက်စီးသွားတယ်။ တခြားအဆောက်အဦးတွေလည်း ပျက်စီးတာရှိတယ်။ အရပ်သားအိမ်က ၁၂ လုံးလောက် ပျက်စီးတယ်။ ကြဲသွားတဲ့ ဗုံးအမျိုးအစားတော့ မသိဘူး။ ဒါပေမဲ့ ဗုံးသီးကျတဲ့နေရာတွေက ချိုင့်ခွက်တွေဖြစ်သွားတယ်။ အသံကလည်း အရမ်းကျယ်တယ်။ မြေကြီးပါ တုန်ခါသွားတယ်။”လို့ ဝေဘူလမြို့ခံအမျိုးသားတစ်ဦးက ရွှေဖီမြေသို့ ပြောပါတယ်။
လက်ရှိမှာ ဝေဘူလမြို့ခံတချို့ဟာ နောက်ထပ် စစ်ကောင်စီ လေကြောင်း ဗုံးကြဲတိုက်ခိုက်မှု လုပ်ဆောင်မှာကို စိုးရိမ်တာကြောင့် ဘေးလွတ်ရာကို တိမ်းရှောင်သူရှိနေပါတယ်။
လက်တလော ချင်းပြည်နယ်အစပ် ကလေးမြို့နယ်တောင်ပိုင်း၊ ကျေးရွာတွေမှာ ချင်းကာကွယ်ရေးတပ်ဖွဲ့တွေနဲ့ တိုက်ပွဲတွေပြင်းထန်ပြီး စစ်ကောင်စီတပ်က ကျေးရွာတွေကို လေကြောင်း ဗုံးကြဲတိုက်ခိုက်မှုတွေ ဆက်တိုက်ပြုလုပ်နေပါတယ်။
စစ်ကောင်စီက ယာယီပစ်ခတ်တိုက်ခိုက်မှုရပ်စဲရေး ကြေညာထားပေမဲ့ ချင်းပြည်နယ်မှာ လေကြောင်း တိုက်ခိုက်မှု ပြုလုပ်နေသလို ချင်းပြည်နယ်အစပ် ကလေးတောင်ပိုင်းမှာ အင်အားအများကြီးနဲ့ စစ်ကြောင်းထိုးပြီး တိုက်ပွဲတွေ ဖော်ဆောင်နေပါတယ်။
ဧပြီလ ၂၇ ရက်နေ့ မနက်က ကလေးမြို့နယ်တောင်ပိုင်း ချင်းကာကွယ်တပ်ဖွဲ့တွေ သိမ်းပိုက်ရရှိထားတဲ့ ကြံသာကျေးရွာ စခန်းကို စစ်ကောင်စီတပ်က လေကြောင်း ဗုံးကြဲတိုက်ခိုက်သလို မြေပြင်ကလည်း စစ်ကြောင်းထိုးစစ်ဆင်ပြီး တိုက်ပွဲပြင်းထန်ကာ စစ်ကောင်စီတပ်ဖွဲ့ဝင် အလောင်း ၂၀ ရရှိပြီး သေနတ် ၁၁ သိမ်းဆည်းရမိတယ်လို့ ရှေ့တန်းချင်းစစ်ရေးသတင်းအရစ်မြစ်ဆီက သိရပါတယ်။
