လွေးလာဝ်ဇာရ်၊ ဧပြီ ၂၉ ရက်၊ မိုင်းယော်
ရှမ်းမြောက် လားရှိုးမြို့ မိုင်းယော်တိုက်နယ်က ရွာသစ်ကျေးရွာမှာ မိုးကြိုးပစ်လို့ အမျိုးသမီးတစ်ဦး ထိခိုက်ဒဏ်ရာရပြီး လေပြင်းမုန်တိုင်းတိုက်ခတ်မှုကြောင့် နေအိမ်တချို့လည်း ပျက်စီးသွားခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဧပြီ ၂၇ ရက်က နေ့လယ် ၃ နာရီခွဲမှာ လေပြင်းမုန်တိုင်းတိုက်ခတ်မှုကြောင့် နေအိမ် ၄ လုံး ပျက်စီးသွားခဲ့တာဖြစ်တယ်လို့ ဆိုပါတယ်။
ဖြစ်စဉ်သိရှိသူ အမျိုးသားတစ်ဦးက “အဲနေ့က မိုးလည်းရွာတယ်။ လေပြင်းလည်းတိုက်တော့ နေအိမ် ၄ လုံးက ဘာမှရစရာမရှိတော့ဘူး။ အကုန်ပါသွားတာ။ မိုးကြိုးပစ်ခံရတဲ့ မိန်းကလေးတစ်ယောက်ကတော့ သူက အိမ်ထဲမှာနေတာ။ မိုးကြိုးက အိမ်ပတ်ပတ်လည်ကို ပစ်နေတာ။ နောက်ဆုံးကျမှ သူ့ကိုထိတာ။ သေတော့မသေဘူး။ ဒဏ်ရာရသွားတယ်” လို့ ပြောပါတယ်။
မိုးကြိုးပစ်ခံရတဲ့ အမျိုးသမီးဟာ မိုင်းယော်ဆေးရုံမှာ ဆေးကုသမှုခံယူနေပြီး ပျက်စီးသွားတဲ့ နေအိမ် ၄ လုံးအတွက်လည်း အကူအညီ လိုအပ်နေတယ်လို့ အထက်ပါ အမျိုးသားက ပြောပါတယ်။
အလားတူ ပြီးခဲ့တဲ့ ဧပြီ ၂၇ ရက်မှာလည်း ရှမ်းတောင် ကလောမြို့နယ် ပိန္နဲပင်ရွာမှာ မိုးသက်လေပြင်းနဲ့ မိုးသီးကြောင့် နေအိမ် ၉၃ အိမ် ပျက်စီးသွားခဲ့တယ်လို့ သိရပါတယ်။
