ခိုင်လေး၊ ဧပြီ ၂၉ ရက်၊ မင်းလှ
ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ သရော်ကုန်ရွာ ဘုန်းကြီးကျောင်းကနေ အင်အား ၇၀ ကျော်နဲ့ ထွက်လာတဲ့ စစ်ကြောင်းကို သာယာဝတီခရိုင် PDF နဲ့ ပူးပေါင်းမဟာမိတ်တပ်ဖွဲ့တို့က ပိတ်ဆို့ တိုက်ခိုက်မှုကြောင့် စစ်ကောင်စီတပ်သား ၁၀ ဦး သေဆုံးပြီး လက်နက်ခဲယမ်း အချို့ သိမ်းဆည်းရမိခဲ့ပါတယ်။
ပြီးခဲ့တဲ့ ဧပြီ ၂၇ ရက် သရော်ကုန်ရွာ ဘုန်းကြီးကျောင်းကနေ ထွက်ခွာလာတဲ့ စစ်ကြောင်းက ငမိုးရိပ်ရွာထဲ ရောက်ရှိလာစဉ် သာယာဝတီခရိုင် တပ်ရင်း (၃၈၀၂) ၊ (၃၈၀၃)၊ (၃၈၀၁) ပူးပေါင်းမဟာမိတ် တော်လှန်ရေးတပ်ဖွဲ့တွေက နှစ်ဖက်ညှပ် ပိတ်ဆို့တိုက်ခိုက် ခဲ့တာဖြစ်တယ်လို့ သာယာဝတီခရိုင် PDF မှ တာဝန်ရှိသူတစ်ဦးက ရွှေဖီမြေကိုပြောပါတယ်။
”အလောင်းက၁၀လောင်းရတယ်။ ဒဏ်ရာရသူများတယ်။ စစ်တပ်တွေအရမ်းအထိနာလို့ စစ်တပ် တချို့အလံဖြူထောင်မယ်ဆိုပြီး ပြောတာရှိတယ်။ ကျနော်တို့ဘက်က ဒဏ်ရာရသူတချို့ရှိတယ်။ ကျွန်းကုန်းနားက တောစပ်မှာပုန်းနေတာမြင်လို့ တပ်ခွဲ (၄) နဲ့ (၅) ရဲဘော်တွေက ရှာဖွေဖမ်းဆီးတော့ စစ်သုံ့ပန်းတစ်ဦး ဖမ်းမိတာတော့ရှိတယ်”
အဆိုပါ ပိတ်ဆို့ တိုက်ခိုက်မှု အတွင်းမှာ လက်နက်ကြီး၊ လက်နက်ငယ်တွေနဲ့ အပြန်အလှန် ပစ်ခတ်တိုက်ခိုက်ခဲ့ပြီး စစ်ကောင်စီဘက်က အထိနာတာများခဲ့တာကြောင့် စစ်ကောင်စီတပ်ဘက်က လေကြောင်းနဲ့ လာရောက်ပစ်ကူပေးတာမျိုးလည်း ရှိခဲ့တယ်လို့ အထက်ပါ ၎င်းကဆက်ပြောပါတယ်။
တိုက်ပွဲ ဖြစ်ပွားပြီးနောက် တော်လှန်ရေး တပ်ဖွဲ့ဘက်က စစ်ကောင်စီရဲ့ သေနတ် ၁၁ လက် ၊ ၆၀ မမ ၁ လက်၊ ခဲယမ်းတချို့တွေနဲ့ စစ်သုံးပစ္စည်းတချို့ သိမ်းဆည်းရမိခဲ့တယ် လို့ဆိုပါတယ်။
အဆိုပါ ပိတ်ဆို့တိုက်ခိုက်တဲ့အခါမှာ သာယာဝတီခရိုင် တပ်ရင်း (၃၈၀၂) မှ တပ်ခွဲ (၁) ၊ တပ်ခွဲ(၂)၊ တပ်ခွဲ (၃)၊ တပ်ခွဲ (၄) မြေအောက်ပြောက်ကျားတပ်ဖွဲ့-အုတ်ဖို၊ တပ်ခွဲ (၅)၊ တပ်ခွဲ (၆ ) နဲ့ သာယာဝတီခရိုင် တပ်ရင်း (၃၈၀၃)၊ သာယာဝတီ ခရိုင် တပ်ရင်း (၃၈၀၁) မှ တပ်ခွဲ (၆ ) ၊ ပဲခူးခရိုင် တပ်ရင်း (၃၇၀၁) တပ်ခွဲ (၅) တို့ပူးပေါင်း ပိတ်ဆို့တိုက်ခိုက်ခဲ့တာဖြစ်ပြီး စစ်ကောင်စီတပ်ဆုတ်ခွာ သွားပြီးချိန်မှာ အထက်ပါ ပူးပေါင်းတပ်ဖွဲ့တွေက နယ်မြေရှင်းလင်းရေး ပြုလုပ်ခဲ့တယ်လို့ ထုတ်ပြန်ထားပါတယ်။
