မိုင်းရူပ၊ ဧပြီ ၂၈ ရက်၊ မန္တလေး
ပြီးခဲ့တဲ့ မတ်လ ၂၈ ရက်မှာ လူပေါင်းထောင်နဲ့ချီ သေဆုံးစေခဲ့တဲ့ ပြင်းအား ၇.၇ အဆင့်ရှိတဲ့ ငလျင် လှုပ်ခတ်မှုဟာ ဒီနေ့ ဧပြီ ၂၈ ရက်မှာ ၁ လ ပြည့်ခဲ့ပြီ ဖြစ်ပါတယ်။
ငလျင်ကြောင့် ပျက်စီးသွားတဲ့ အဆောက်အအုံတွေကို လူမှုကူညီရေးအဖွဲ့နဲ့ နိုင်ငံတကာ ကယ်ဆယ်ရေးအဖွဲ့တွေက ရှင်းလင်းရေး ဆက်လုပ်နေပြီး ၁ လ ကြာတဲ့အထိ မထုတ်ယူနိုင်သေးတဲ့ အလောင်းတွေလည်း ကျန်ရှိနေပါသေးတယ်။
ငလျင် လှုပ်ခတ်မှုကြောင့် ထိခိုက်သေဆုံးမှုများတဲ့ မန္တလေးမှာ နေအိမ် အပျက်အစီးတွေကြား တဲထိုးပြီး နေထိုင်ကြရပြီး ပူပြင်းတဲ့ ရာသီဥတုဒဏ်ကိုလည်း ခံစားနေရတယ်လို့ ငလျင်ဒဏ်သင့်ခဲ့တဲ့ ပြည်ကြီးတံခွန်မြို့ခံတစ်ဦးက ရွှေဖီမြေကို ပြောပါတယ်။
“အားလုံး မရှင်းနိုင်သေးဘူး။ တချို့တိုက်တွေဘဲ ရှင်းလင်းတာ တွေ့ရတယ်။ ရာသီဥတုက တအားပူတယ်။ ဒုက္ခသည်စခန်းတွေဆို ကြပ်သိပ်နေတယ်”
ဒါ့အပြင် ငလျင် လှုပ်ခတ်မှု ဖြစ်ပွားပြီးနောက် နောက်ဆက်တွဲ ငလျင်ငယ် လှုပ်ခတ်တာတွေလည်း ဆက်ဖြစ်နေတာကြောင့် လူထုတွေက စိုးရိမ်နေရပါတယ်။
“ငလျင်လည်း နေ့တိုင်းဆိုတော့ ထိတ်လန့်တာ ရှိတယ်။ ငလျင် လှုပ်ရင်ကို လမ်းပေါ်ပြေးချင်တဲ့ရောဂါ ရကုန်ပြီ” လို့ အထက်ပါအမျိုးသားက ဆက်ပြောပါတယ်။
ပြီးခဲ့တဲ့ မတ်လ ၂၈ ရက်မှာ ပြင်းအား ၇.၇ အဆင့်ရှိတဲ့ ငလျင်လှုပ်ခတ်မှုကြောင့် စစ်ကိုင်း၊ မန္တလေး၊ နေပြည်တော်နဲ့ ရှမ်းတောင်မှာ သေဆုံးသူ ထောင်နဲ့ချီ ရှိခဲ့ပြီး အထင်ကရနေရာအပါအဝင် အဆောက်အဦးတွေလည်း ထိခိုက်ပျက်စီးခဲ့ပါတယ်။
စစ်ကောင်စီရဲ့ ဧပြီ ၂၆ ရက်အထိ စာရင်းအရ နိုင်ငံတစ်ဝန်းမှာ ငလျင်ကြောင့် သေဆုံးသူ ၃,၇၆၉ ဦးနဲ့ ဒဏ်ရာရသူ ၅,၁၀၆ ဦးရှိပြီး ပျောက်ဆုံးနေသူ ၁၀၇ ဦး ရှိတယ်လို့ ထုတ်ပြန်ထားပါတယ်။
