မိုင်းရူပ၊ ဧပြီ ၂၈ ရက်၊ ဖယ်ခုံ
ရှမ်းတောင် ဖယ်ခုံမြို့နယ် မိုးဗြဲမြို့မှာ စစ်ကောင်စီတပ်ရဲ့ ထိုးစစ်ကြောင့် စစ်တပ်နဲ့ ကရင်နီ တော်လှန်ရေး အင်အားစုတို့အကြား တိုက်ပွဲ ပြင်းထန်နေပါတယ်။
မနေ့ ဧပြီ ၂၇ ရက်ကစပြီး မိုးဗြဲအခြေစိုက် စစ်ကောင်စီရဲ့ ခြေမြန်တပ်ရင်း ၄၂၂ တပ်ကနေ အင်အား ၁၀၀ ကျော်ရှိတဲ့ စစ်ကြောင်းဟာ မိုးဗြဲမြို့ကို ထိုးစစ် ဆင်လာပြီး ဒီနေ့ ဧပြီ ၂၈ ရက်အထိ တိုက်ပွဲ ပြင်းထန်နေတယ်လို့ ဆိုပါတယ်။
“ထိခိုက်မှုတော့ အရမ်းများတယ်။ စကစက လက်နက်ကြီးကို မိုးရွာသလို ပစ်ချနေတယ်။ လေယာဥ်နဲ့လည်း ၂ ခေါက် လာကြဲတယ်” လို့ မိုးဗြဲတိုက်ပွဲမှာ ပါဝင်တိုက်ခိုက်နေတဲ့ ရှမ်းတောင် စစ်ဒေသခွဲ PDF အမှတ်(၁) ဗျူဟာရဲ့ သတင်းပြန်ကြားရေးတာဝန်ခံက ရွှေဖီမြေကို ပြောပါတယ်။
မနေ့ ဧပြီ ၂၇ ရက်မှာ တိုက်ပွဲအတွင်း မိုးဗြဲတပ်ရင်း ၁၀၀၁ ဘက်က ရဲဘော်တစ်ဦး ကျဆုံးပြီး စစ်တပ်ဘက်ကလည်း ထိခိုက်သေဆုံးမှု များတယ်လို့ သူက ဆက်ပြောပါတယ်။
ဒါ့အပြင် မနေ့မှာပဲ စစ်တပ်က ပစ်ခတ်တဲ့ လက်နက်ကြီးကြောင့် မိုးဗြဲမြို့ရှိ အသက် ၄၀ ဝန်းကျင် အမျိုးသားတစ်ဦး သေဆုံးခဲ့ပါတယ်။
မိုးဗြဲမြို့ရဲ့ နေရာအများစုကို ကရင်နီ တော်လှန်ရေး အင်အားစုတွေက ထိန်းချုပ်နိုင်ခဲ့ပေမဲ့ မိုးဗြဲမြို့အနီးမှာ စစ်ကောင်စီရဲ့ ခြေမြန်တပ်ရင်း (ခမရ ၄၂၂) ကျန်ရှိနေဆဲ ဖြစ်ပါတယ်။
ပြီးခဲ့တဲ့ ၂၀၂၄ ခုနှစ် ဒီဇင်ဘာလကစပြီး မိုးဗြဲမြို့ကို စစ်တပ်က ထိုးစစ်ဆင် တိုက်ခိုက်လာတာကြောင့် တိုက်ပွဲ ပြင်းထန်ခဲ့ရာ ငလျင် လှုပ်ခတ်မှု ဖြစ်ပွားပြီးနောက်မှာ တိုက်ပွဲ ပြန်လည် ငြိမ်သက်ခဲ့ပေမဲ့ လက်ရှိမှာ တိုက်ပွဲ ပြင်းထန်လာတာပဲ ဖြစ်ပါတယ်။
