ခိုင်လေး၊ ဧပြီ ၂၈ ရက် ၊မတ္တရာ
မန္တလေးတိုင်း မတ္တရာမြို့နယ် အရှေ့ဘက်ခြမ်း ရုံးပင်ရွာ အနီး တစ်ဝိုက်ကို စစ်ကောင်စီက ပေါင် ၅၀၀ ဗုံး နှစ်လုံး လေကြောင်းကနေ ကြဲချတိုက်ခိုက်ခဲ့တာကြောင့် အမျိုးသမီး တစ်ဦး ပြင်းထန်ဒဏ်ရာရခဲ့ပါတယ်။
မနေ့ ဧပြီ ၂၇ရက် မနက် ၁၂ နာရီ ၁၅ မိနစ်က Jet Fighter တစ်စီးနဲ့ ပေါင် ၅၀၀ ဗုံးတစ်လုံး ကြဲချတိုက်ခိုက်ခဲ့ရာ ရုံးပင်ရွာက တိုက်၂ လုံးပျက်စီးခဲ့ပြီး အမျိုးသမီး တစ်ဦး ထိခိုက်ဒဏ်ရာရရှိခဲ့တယ်လို့ မြေပြင်အခြေအနေ သိရှိသူတစ်ဦးက ရွှေဖီမြေကိုပြောပါတယ်။
”နှစ်လုံးကြဲတယ်။ ပထမ တစ်လုံးက ရုံးပင်ရွာမှာ ကျတယ်။ အမျိုးသမီး တစ်ဦးနဲ့ တိုက်အိမ် နှစ်လုံး ထိခိုက်တယ်။ နောက် ဒုတိယအကြိမ် ပြန်ကြဲတော့ လယ်ကွင်းထဲကျတယ်။ ထိခိုက်မှု တော့မရှိဘူး”
ပြီးခဲ့တဲ့ ဧပြီ ၂၅ ရက်နေ့ ည ပိုင်း၁၁နာရီ ဝန်းကျင်ကလည်း မတ္တရာမြို့ အရှေ့ဘက်ခြမ်း ရှမ်းရွာမှာ စစ်ကောင်စီက ဟောင်ဝစ်ဇာနဲ့ ရမ်းသမ်းပစ်ခတ်မှူကြောင့် ဦးဇင်း ၃ ပါးထိခိုက် ဒဏ်ရာရခဲ့ပါတယ်။
မတ္တရာဘက်မှာ စစ်ကောင်စီတပ်က တိုက်ပွဲဖြစ်ပွား ခြင်းမရှိတဲ့ နေရာတွေမှာ ပြည်သူအိုးအိမ် တွေကို အဓိကစစ်ရေးပစ်မှတ်ထားပြီး လေကြောင်းတိုက်ခိုက်မှု ဆက်တိုက် ပြုလုပ်နေတာကြောင့် ဒေသခံတွေအနေနဲ့ သတိထားပြီးနေထိုင်ကြဖို့ Voice of Mandalay မှ အသိပေး တိုက်တွန်းထားပါတယ်။
