လွေးထွေး၊ ဧပြီ ၂၇ ရက်
စစ်ကောင်စီတပ်က အပစ်ရပ်ထုတ်ပြန်ထားတဲ့ ဧပြီ ၂ ရက်ကနေ ၂၂ ရက်အထိ ကရင်အမျိုးသားအစည်းအရုံး KNU ထိန်းချုပ်ဒေသကို လေကြောင်းနဲ့ လက်နက်ကြီး အသုံးပြုတိုက်ခိုက်ခဲ့တာကြောင့် အရပ်သား ၁၉ ဦး သေဆုံးခဲ့ပြီး သံဃာ ၄ ပါး ပျံလွန်တော်မူခဲ့ကြောင်း မနေ့ဧပြီ ၂၆ ရက်မှာ KNUဘက်က ထုတ်ပြန်ထားပါတယ်။
စစ်ကောင်စီတပ်ဟာ ပြည်သူလူထုကို ပစ်မှတ်ထားပြီး လေကြောင်းတိုက်ခိုက်မှု၊ လက်နက်ကြီး ပစ်ခတ်မှု၊ ပြည်သူပိုင်ပစ္စည်းတွေကို မီးရှို့ဖျက်ဆီးတာ၊ မိုင်းထောင်တာနဲ့ ဖမ်းဆီးထိမ်းသိန်းတာစတဲ့ လူ့အခွင့်အရေးချိုးဖောက်မှုပေါင်း ၁၀၇ ကြိမ် ချိုးဖောက်ခဲ့တယ်လို့လည်း ဆိုပါတယ်။
KNU ရဲ့ ပြောရေးဆိုခွင့်ရှိသူ ပဒိုစောတောနီးက “သူတို့က ဘယ်လောက်ဘဲ အပစ်ရပ်တယ်ဆိုပြီး ပြောနေပါစေ လက်တွေ့သူတို့လုပ်ရပ်က သက်သေပြနေတာဘဲ။ လူထုတွေကို ပစ်မှတ်ထား တိုက်ခိုက်နေတာဘဲဖြစ်တယ်” လို့ ရွှေဖီမြေကို ပြောပါတယ်။
ဒါ့အပြင် အရပ်သား ၅၂ ဦး ထိခိုက်ဒဏ်ရာရခဲ့ပြီး ဘုန်းကြီးကျောင်း ၅ ကျောင်းနှင့် နေအိမ် ၂၃ လုံး ထိခိုက်ပျက်စီးခဲ့ရတယ်လို့လည်း ထုတ်ပြန်ချက်ထဲ ရေးသားထားပါတယ်။
ငလျင်ဒဏ်ကြောင့် စစ်ကောင်စီတပ်ဟာ ဧပြီ ၃၀ ရက်အထိ အပစ်ရပ်ကြေညာထားပေမယ့် မြန်မာနိုင်ငံရဲ့နေရာတချို့ကို နေ့တိုင်း လေကြောင်းအသုံးပြုတိုက်ခိုက်တာနဲ့ လက်နက်ကြီးပစ်ခတ်တာတွေ ပြုလုပ်နေပါတယ်။
စစ်ကောင်စီတပ်ဟာ မတ်လ ၂၈ ရက်ကနေ ဧပြီ ၂၅ ရက်အထိ လေကြောင်းနဲ့ လက်နက်ကြီးအသုံးပြုပြီး တိုက်ခိုက်မှုပေါင်း ၃၄၉ ကြိမ် ပြုလုပ်ခဲ့ပြီး အရပ်သားလူထုနဲ့ တော်လှန်ရေးတပ်ဖွဲ့ဝင် ၂၆၄ ဦးထပ်မနည်း သေဆုံးခဲ့ရကြောင်း DVB ရဲ့ အချက်အလက်အရ သိရပါတယ်။
