မြတ်နိုး၊ ဧပြီ ၂၆၊
ရှမ်းပြည်နယ် ကျိုင်းတုံ – တောင်ကြီးလမ်းမှာ ပြီးခဲ့တဲ့ ဧပြီလ ၂၄ ရက်နေ့က ခရီးသည်ကားတစ်စီးရဲ့ ကားသမားက အရက်မူးရင်း ကားမောင်းရာကနေ တိမ်းမှောက်လို့ ၂ ဦး ဒဏ်ရာရခဲ့ကြောင်း လိုက်ပါစီးနင်းလာခဲ့တဲ့ ခရီးသည်တွေဆီက သိရပါတယ်။
“ထိတာ ၂ ယောက်။ ဗိုက်ကြီးသည်ပါတယ်။ ခါးထိတဲ့ သူရယ်၊ လက်ထိတဲ့ သူရယ်။ ခါးထိတဲ့ သူက ဆိုးတယ်။ လမ်းလျှောက်လို့ မရဘူး။” လို့ ခရီးသည် အမျိုးသမီး တစ်ဦးက ပြောပါတယ်။
အဲကားဟာ ဒို့ညီနောင်ကားဂိတ်က ကားဖြစ်ပြီး ကျိုင်းတုံ – တောင်ကြီးကို ညနေ ၄ နာရီကျော်က စထွက်ခဲ့တာဖြစ်တယ်လို့ သူက ပြောပါတယ်။
ကားမထွက်ခင် ၂ နာရီ စောရောက် နေကြတဲ့ ခရီးသည်တွေက ကားမထွက်ခင်ကတည်းက ကားသမား မူးနေတာကိုတွေ့လို့ ဂိတ်မှူးကို ဝိုင်းပြောမှ တခြား ကားသမား တစ်ယောက်ကို နောင်ချိုထိ မောင်းခိုင်းပြီး သူ့ကိုနောက်ကနေ လိုက်ခိုင်းတာကို ပန်ကြူရောက်တာနဲ့ မောင်းနေတဲ့လူကို ပြန်လွှတ်ပြီး အရက်မူးနေတဲ့ကားသမားက ပြန်တက်မောင်းတာဖြစ်တယ်လို့ သူက ပြောပါတယ်။
“သူ့ဟာသူ အရှိန်လွန်ပြီးမှောက်တာ။ အဲဒီလောက်မူးနေတာ အမြန်မောင်းတဲ့အပြင်ခရီးသည်တွေ အရှိန်လျော့ဖို့ ပြောတာကိုလည်း သူက ရန်ပြန်လုပ်ပါသေးတယ်။ လမ်းမှာ ABC ဘီယာ တစ်ဘူး ထပ်သောက်သေးတယ်” လို့ နောက်ထပ် ခရီး သည် တစ်ဦးက ပြောပါတယ်။
တုံတာရောက်ပြီးနောက် ၁၅ မိနစ်အကြာလောက်မှာပဲ ကိုးကွေ့တောင်ရဲ့ ခြောက်ကွေ့မြောက်မှာကားချောက်ထဲကျသွားပြီး ကြီးမားတဲ့ထိခိုက်မှု မရှိပေမယ့် သစ်ပင်သာ မရှိရင် ကားဟာ ချောက်ထဲကျပြီလို့ သူက ပြောပါတယ်။
“အန်စာတုံးလို ကားမျိုးပါ။ ကိုယ်ဝန်ဆောင် အမ တစ်ယောက်က ခါးတော်တော်ထိသွားတယ်။ ကျန်တဲ့သူတွေတော့ သိပ်မထိဘူး။ အခြေအနေက ရှုပ်နေတုန်းပဲ။ ဘာတာဝန်ယူမှု၊ တာဝန်ခံမှု၊ တောင်းပန်မှု မှ မရှိသေးဘူး။ ပစ္စည်းတွေလည်း ပြန်မရသေးဘူး။ ဂိတ်ကတော့ လုပ်ပေးမယ် ပြောပြီး အခုထိ ဘာမှ မသိရသေးဘူး။” လို့ နောက်ထပ် ခရီးသည် တစ်ဦးကလည်း ပြောပါတယ်။
ပြီးခဲ့တဲ့ မတ်လ ၁ ရက်နေ့ ညဦးပိုင်းကလည်း ကျိုင်းတုံ – တောင်ကြီး လမ်းပိုင်း မိုင်တိုင် ၃၆၆ အနီးမှာ ခရီးသည်တင်ကားကြီး တစ်စီး ချောက်ထဲ ပြုတ်ကျပြီး ခရီးသည် ၇ ဦးသေဆုံးကာ ၂၅ ဦး ထိခိုက် ဒဏ်ရာရတာ ရှိခဲ့ဖူးပါတယ်။
ကျိုင်းတုံ – တောင်ကြီးလမ်းမှာ မကြာခဏ ကားမှောက်တာတွေ ချောက်ထဲ ပြုတ်ကျတာတွေ ရှိတာကြောင့် ကားသမားတွေအနေနဲ့ အထူး သတိထား ဂရုစိုက်ဖို့လိုတယ်လို့ ဒေသခံ တွေက ပြောပါတယ်။
