မိုင်းရူပ၊ ဧပြီ ၂၆ ရက်၊ ဆင်ပေါင်ဝဲ
မကွေးတိုင်း ဆင်ပေါင်ဝဲမြို့နယ်ရှိ စစ်ကောင်စီရဲ့ ကာကွယ်ရေးပစ္စည်းစက်ရုံ အမှတ် (၁၃) ကို ရှော့တိုက်ဒုံးနဲ့ တိုက်ခိုက်ခဲ့ရာ စစ်ကောင်စီဘက်က ထိခိုက်မှု များတယ်လို့ တိုက်ခိုက်မှုမှာ ပါဝင်တဲ့ Brave Warriors for Myanmar (BWM) ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
မနေ့ ဧပြီလ ၂၅ ရက် ညသန်းခေါင် ၁၂ နာရီဝန်းကျင်မှာ ကာကွယ်ရေးပစ္စည်းစက်ရုံ အမှတ် (၁၃) ကို ရှော့တိုက်ဒုန်း ၁၀ လုံးနဲ့ ပစ်ခတ်ခဲ့ရာ စက်ရုံရဲ့ အရေးပါတဲ့ နေရာတွေကို ထိမှန်ခဲ့ပြီး စစ်ကောင်စီဘက်က ထိခိုက်သေဆုံးမှု များနိုင်တယ်လို့ ဆိုပါတယ်။
“စကစဘက်ကတော့ စက်ရုံတွေရော လူတွေရော အတော်ထိတယ်လို့ ကနဦး သိထားရပါတယ်။ အတည်ပြုချက်ရရင် အသေးစိပ် ထပ်ကြေညာပေးပါ့မယ်” လို့ BWM ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
ကာကွယ်ရေးပစ္စည်းစက်ရုံ အမှတ် (၁၃) ဟာ စစ်ကောင်စီအတွက် အရေးပါတဲ့ လက်နက်ပစ္စည်းတွေကို ထုတ်လုပ်ပေးနေတဲ့ နေရာဖြစ်တယ်လို့ သူက ဆက်ပြောပါတယ်။
ဒီတိုက်ခိုက်မှုကို BWM နဲ့အတူ ကာကွယ်ရေးတပ်တွေဖြစ်တဲ့ Upper Minhla PDF နဲ့ People Independence Army – PLO/PLA လည်း ပါဝင်တိုက်ခိုက်ခဲ့ပါတယ်။
စစ်ကောင်စီတပ်ဘက်တော့ ကာကွယ်ရေးပစ္စည်းစက်ရုံ အမှတ် (၁၃) ရှော့တိုက်ဒုံးနဲ့ တိုက်ခိုက်ခံရတာနဲ့ ပတ်သက်ပြီး တစ်စုံတစ်ရာ သတင်းထုတ်ပြန်ထားတာ မရှိသေးပါဘူး။
