မိုင်းအရှိုင်း၊ ဧပြီ ၂၅ ရက်၊ ရွှေဖီမြေ
ကျောက်မဲမြို့နယ် ကြူရှာကျေးရွာအုပ်စု၊ ပန်ဆန်ကျေးရွာက ကလေးငယ်တွေဟာ လက်ဖက်ခြံထဲမှာရှိတဲ့ လက်နက်အကြွင်းအကျန်ကို ယူဆော့ကစားမိရာကနေ ပေါက်ကွဲမှုဖြစ်ပြီး အသက် ၈ နှစ်အရွယ် ကလေးတစ်ယောက် ပွဲချင်းပြီးသေဆုံးကာ ကိုရင်ငယ် ၁ပါးအပါအဝင် ၄ ဦးက ပြင်းထန်စွာ ဒဏ်ရာရှိခဲ့ပါတယ်။
ဖြစ်စဥ်က မနေ့က ဧပြီ ၂၄ ရက်မှာ ဖြစ်ပွားခဲ့တာ ဖြစ်ပြီး လက်ဖက်ခူးပြီး ညနေပိုင်း ၅ နာရီအချိန် အိမ်ပြန်ဖို့ လုပ်တဲ့အချိန်မှာ M-9အမျိုးအစား လက်နက်အကြွင်းအကျန်တစ်ခုကို ကလေးတွေဆော့ကစားနေကြစဉ် ပေါက်ကွဲမှု ဖြစ်ခဲ့တာပါ။
“အဲဒီလက်နက်က လူကြီးတွေတွေ့လို့ သစ်ထဲသွားထည့်တားတာ။ ကလေးတွေဆိုတော့ မြင်ပြီး ယူဆော့မိတာ။ အဲချိန်က သူတို့ အိမ်ပြန်မယ်လုပ်တဲ့အချိန်ပေါ့။ ကလေးတွေက ဟိုပြေးဒီပြေးနဲ့။ သူတို့ဆော့ကစားလို့ ပေါက်ကွဲတာ” လို့ဖြစ်စဥ်ကိုသိရှိသူကတစ်ဦး ပြောပါတယ်။
ဒီပေါက်ကွဲမှုမှာ သေဆုံးသူဟာ မိုင်းဇော်မင်းကို (၈ နှစ်) ဖြစ်ပြီး ဒဏ်ရာပြင်းထန်သူက ကိုရင်ဖြစ်တဲ့ မိုင်းဇော်မင်းထွေး (၁၁ နှစ်)၊ မိုင်းကောင်းခန့် (၄ နှစ်)၊ လွေးမြဟန် နှင့် မယ်မောင်ခင်တို့က ဒဏ်ရာ ရရှိခဲ့ပါတယ်။
“ဒဏ်ရာပြင်းထန်တဲ့ ကိုရင်လေးမိသားစုက ချို့တဲ့ကြတယ်။ အခုဆေးကုဖို့ ပိုက်ဆံက မရှိကြဘူရ။ ကူနိုင်မယ့်လူရှိရင် အကူအညီပေးစေချင်တယ်”လို့ နောက်ထပ် ဒေသခံတစ်ဦးက ပြောပါတယ်။
အဲဒေသမှာ ၂၀၂၁ နှစ်ကုန်ပိုင်းတုန်းက ရှမ်းပြည်ပြန်လည်ထူထောင်ရေးကောင်စီ- RCSS နဲ့ ပူးပေါင်းတပ်ဖြစ်တဲ့ TNLA နဲ့ SSPP တပ်တို့က တိုက်ပွဲ ဖြစ်ပွားခဲ့တဲ့နေရာတစ်ခု ဖြစ်ပြီး လက်နတ်အကြွင်းအကျန်တွေ ကျန်ရှိနေဆဲ နေရာတစ်ခုလည်း ဖြစ်ပါတယ်။
