ခိုင်လေး၊ ဧပြီ ၂၄ ရက်၊ ထန်းတပင်
ပဲခူးတိုင်း ထန်းတပင်မြို့နယ် သောင်ပုချောင်ရွာဘက် စစ်ကောင်စီတပ် ပစ်ခတ်တဲ့ လက်နက်ကြီး ၂ လုံး ကျရောက်ပေါက်ကွဲရာ ဒေသခံတစ်ဦး သေဆုံးပြီး ၄ ဦး ထိခိုက်ဒဏ်ရာ ရခဲ့ပါတယ်။
ဒီနေ့ ဧပြီ ၂၄ ရက် မနက်အစောပိုင်း ၁ နာရီခန့်က စစ်တပ် ပစ်ခတ်တဲ့ လက်နက်ကြီးကြောင့် တစ်ဦး သေဆုံးကာ ၈ နှစ်အရွယ် ကလေးငယ်တစ်ဦးအပါအဝင် ၃ ဦး ပြင်းထန်ဒဏ်ရာ ရရှိခဲ့ပြီး တစ်ဦးက ပွန်းပဲ့ဒဏ်ရာ အနည်းငယ် ရရှိခဲ့တယ်လို့ တောင်ငူခရိုင် ပြည်သူ့ကာကွယ်ရေးတပ်မတော် တပ်ရင်းအမှတ် (၃၅၀၂)ရဲ့ သတင်းနဲ့ပြန်ကြားရေး တာဝန်ခံတစ်ဦးက ရွှေဖီမြေကို ပြောပါတယ်။
”အိမ်ပေါ်တည့်တည့်ကျတာ။ သူတို့က မိသားစုဝင်တွေပါ။ အသက်ကြီးတဲ့တစ်ဦးကတော့ သေဆုံးသွားတယ်။ ဒဏ်ရာရတဲ့သူတွေကိုတော့ ဆေးရုံ လွှဲထားပေးတယ်။ အဲမှာက တိုက်ပွဲ ဖြစ်ပွားတာမျိုးတော့ မရှိဘူး”
အသက် ၇၀ ကျော် အမျိုးသမီးတစ်ဦး သေဆုံးခဲ့ပြီး ၅၀ နှစ်ခန့် အမျိုးသားတစ်ဦးနဲ့ အမျိုးသမီးတစ်ဦး၊ ၈ နှစ်အရွယ် ကလေးငယ်တစ်ဦးနဲ့ ၄၀ အရွယ် အမျိုးသားတစ်ဦး ဒဏ်ရာ ရရှိခဲ့တယ်လို့ ဆိုပါတယ်။
ကျေးရွာမှာ တိုက်ပွဲဖြစ်ပွားတာမရှိဘဲ စစ်တပ်က ဒေသခံတွေ နေထိုင်တဲ့နေရာတွေကို ရည်ရွယ်ချက်ရှိရှိ ပစ်ခတ်တိုက်ခိုက်နေတာ ဖြစ်တယ်လို့ ၎င်းက ဆက်ပြောပါတယ်။
ပြီးခဲ့တဲ့ ဧပြီ ၁၁ ရက်ကလည်း ပဲခူးတိုင်း ရေတာရှည်မြို့နယ် ရေငံရွာမှာ တိုက်ပွဲ ဖြစ်ပွားတာမရှိဘဲ စစ်တပ်က ဒေသခံတွေနေထိုင်တဲ့နေရာကို ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် အရပ်သားတစ်ဦး သေဆုံးခဲ့ပါတယ်။
