ခိုင်လေး၊ ဧပြီ ၂၃ ရက်၊ စလင်း
မကွေးတိုင်း စလင်းမြို့နယ်က ကျေးရွာတွေဘက် အင်အား အလုံးအရင်းနဲ့ စစ်ကြောင်းထိုးလာတဲ့ စစ်ကောင်စီတပ်ကို ဗမာ့တပ်တော်- Bamar Army က ကြားဖြတ်တိုက်ခိုက်ရာ စစ်တပ်ဘက်က အထိနာခဲ့တယ်လို့ ဗမာ့တပ်တော်က မနေ့ ဧပြီ ၂၂ ရက်မှာ ထုတ်ပြန်ထားပါတယ်။
ပြီးခဲ့တဲ့ ၁၉ ရက်မှာ ဖြစ်ပွားခဲ့တဲ့ တိုက်ပွဲမှာ ဒေသခံ ထိခိုက်တာ မရှိပေမဲ့ ဧပြီ ၂၀ ရက် မနက်အစောပိုင်းမှာ စစ်တပ်က ၆၀ မမနဲ့ ရမ်းသမ်း ပစ်ခတ်ခဲ့တာကြောင့် ပန်းတောကြီးရွာထဲ ကျရောက်ခဲ့ရာ ဒေသခံ ၇ ဦး ဒဏ်ရာရပြီး ၁ ဦး သေဆုံးခဲ့တယ်လို့ ဗမာ့တပ်တော်ရဲ့ ပြောရေးဆိုခွင့်ရှိသူ ရဲဘော်ထွန်းက ရွှေဖီမြေကို ပြောပါတယ်။
”စစ်တပ်ဘက်ကလည်း ထိခိုက်သေဆုံးတာတွေ ရှိပါတယ်။ အခု စလင်းဘက်မှာလည်း တိုက်ပွဲတွေက ဆက်လက် ဖြစ်ပွားနေတာတော့ ရှိတယ်။ စစ်ကြောင်းက စလင်းအနောက်ဘက် ဝန်းပြည့်ဘက်ကနေ ကျနော်တို့ နေတဲ့ဘက်ကို အင်အား ၃၀၀ နဲ့ စစ်ကြောင်းထိုးလာတာတွေ ရှိတယ်။ အဲဒါကို ကျနော်တို့ ရဲဘော်နဲ့ ပူးပေါင်းမဟာမိတ်ရဲဘော်တွေ ပူးပေါင်းပြီး တိုက်ပွဲ ဝင်နေတာ ရှိတယ်”
ဗမာ့တပ်တော်နဲ့ ပူးပေါင်းမဟာမိတ်တပ်ဖွဲ့ ထောင်းထားတဲ့မိုင်းအပြင် ဒရုန်းနဲ့ ဗုံးကြဲတိုက်ခိုက်တာ၊ လက်နက်ကြီး ပစ်ခတ်ခံရတာကြောင့် စစ်တပ်ဘက်က အထိနာနိုင်တယ်လို့ သူက ဆက်ပြောပါတယ်။
ပြီးခဲ့တဲ့ ဧပြီ ၁၉ ရက်မှာ စစ်တပ်က အင်အား ၁၅၀ ခန့်နဲ့ နွယ်တမယ်ရွာကနေ ရှားတောရွာဘက် နွယ်တမယ်မြောင်းအတိုင်း စစ်ကြောင်းထိုး ဝင်ရောက်ခဲ့တာဖြစ်ပြီး တော်လှန်ရေးတပ်ဖွဲ့ ထောင်ထားတဲ့မိုင်း နင်းမိပြီး ပေါက်ကွဲခဲ့တာကြောင့် စစ်တပ်ဘက်က မိုင်းရှင်းလင်းရေးလုပ်ပြီး ဒဏ်ရာရသူကို သယ်ဆောင်ကာ ရွာဘက် ဆက်လက် ချီတက်လာခဲ့တာပဲ ဖြစ်ပါတယ်။
စလင်းမြို့နယ်အတွင်း စစ်တပ်က အင်အား အလုံးအရင်းသုံးပြီး စိုးမိုးနယ်မြေအတွင်း စစ်ကြောင်းခွဲပြီး ထိုးစစ်ဆင်နေတာကြောင့် ဒေသခံတွေအနေနဲ့ လေယာဉ်အန္တရာယ်၊ လက်နက်ကြီးအန္တရာယ်တွေကို ကာကွယ်ဖို့ ဗုံးခိုကျင်း တူးထားဖို့နဲ့ ပြည်သူ့ကာကွယ်ရေးတပ်ရဲ့ ညွှန်ကြားချက်ကို လိုက်နာဆောင်ရွက်ကြဖို့လည်း ဗမာ့တပ်တော်က တိုက်တွန်းထားပါတယ်။
