ရွှေဖီမြေ၊ ဧပြီ ၂၂ ရက်
တော်လှန်ရေးအင်အားစုတွေ ထိန်းချုပ်ထားတဲ့ ဒေသတွေကို လေကြောင်း တိုက်ခိုက်မှု ဆက်တိုက် လုပ်နေတဲ့ စစ်ကောင်စီတပ်က ဧပြီ လကုန်အထိ အပစ်ရပ်ကြောင်း ဒီနေ့ ဧပြီ ၂၂ ရက်မှာ ထုတ်ပြန်လာပါတယ်။
ငလျင်သင့်တဲ့ ဒေသတွေမှာ ကူညီကယ်ဆယ်ရေး လုပ်ဆောင်ပေးနိုင်ဖို့ မနက်ဖြန် ဧပြီ ၂၃ ရက်ကနေ ဧပြီ ၃၀ ရက်အထိ ယာယီ အပစ်ရပ်တာကို သက်တမ်း ထပ်မံ တိုးမြှင့်ထားတယ်လို့ စစ်ကောင်စီက ဆိုပါတယ်။
ဒါပေမဲ့ စစ်ကောင်စီရဲ့ တပ်စခန်းတွေကို လာရောက် တိုက်ခိုက်တာ၊ အင်အားစုဆောင်းတာနဲ့ နယ်မြေချဲ့ထွင်တာတွေ ပြုလုပ်လာရင် ပြန်လည် တုန့်ပြန်မယ်လို့ စစ်ကောင်စီရဲ့ ထုတ်ပြန်ချက်ထဲ ဖော်ပြထားပါတယ်။
ပြီးခဲ့တဲ့ ဧပြီ ၂ ရက်ကနေ ၂၂ ရက်အထိ ၃ ပတ်ကြာ အပစ်ရပ်မယ်လို့ ထုတ်ပြန်ထားပေမဲ့ စစ်ကိုင်း၊ မန္တလေး၊ ရခိုင်၊ ချင်း၊ ကချင်၊ ကရင်နီနဲ့ ရှမ်းမြောက်ရှိ တော်လှန်ရေး အင်အားစုတွေ ထိန်းချုပ်ဒေသကို လေကြောင်းနဲ့ တိုက်ခိုက်တာ၊ ထိုးစစ်ဆင်တာတွေ ဆက်လက် လုပ်ဆောင်ခဲ့ပါတယ်။
ပြီးခဲ့တဲ့ ဧပြီ ၁ ရက်ကနေ ၁၉ ရက်အထိ မန္တလေးတိုင်း သပိတ်ကျင်း၊ မတ္တရာနဲ့ စဥ့်ကူးမြို့နယ်မှာ လေကြောင်း တိုက်ခိုက်မှုကြောင့် သေဆုံးသူ ၄၁ ဦးနဲ့ ဒဏ်ရာရသူ ၅၈ ဦး ရှိခဲ့တယ်လို့ မန္တလေး PDF က ထုတ်ပြန်ထားပါတယ်။
စစ်ကောင်စီတပ်ရဲ့ အပစ်ရပ်မှုဟာ ငလျင်ဘေးသင့်တဲ့ လူထုနဲ့ နိုင်ငံတကာအပေါ် နိုင်ငံရေး အမြတ်ထုတ်လိုတဲ့ လုပ်ကြံလီဆယ်မှုသာ ဖြစ်တယ်လို့ တော်လှန်ရေးအင်အားစုတွေက တုန့်ပြန်ထားပါတယ်။
