ခိုင်လေး၊ ဧပြီ ၂၂ ရက်၊ ညောင်လေးပင်
ပဲခူးတိုင်း ညောင်လေးပင်မြို့နယ် ပုဇွန်မြောင်းရွာဘက် စစ်ကြောင်းထိုး ဝင်ရောက်လာတဲ့ စစ်ကောင်စီ စစ်ကြောင်းကို Fire Dragon တော်လှန်ရေးတပ်ဖွဲ့က ကြားဖြတ်တိုက်ခိုက်ရာ စစ်တပ်ဘက်က အရာရှိအပါအဝင် ၃ ဦး သေဆုံးခဲ့ပြီး ၅ ဦးထက်မနည်း ဒဏ်ရာ ရခဲ့ပါတယ်။
ဧပြီ ၂၀ ရက် မနက် ၅ နာရီခွဲခန့်က အင်အား ၆၀ ခန့်ပါတဲ့ စစ်ကောင်စီ စစ်ကြောင်းက ပုဇွန်မြောင်းရွာထဲ ဒရုန်း၊ လေကြောင်းနဲ့ ပစ်ကူပြီး စစ်ကြောင်းထိုး ဝင်ရောက်ခဲ့တာလို့ P2-3703 Fire Dragon (မီးနဂါး) စစ်ကြောင်းက ထုတ်ပြန်ထားပါတယ်။
”ရွာထဲကို စစ်ကြောင်းထိုးဖို့ လုပ်တာ။ မြေပြင်မှာ ထိုးတုန်း သူတို့က ဒရုန်းတွေနဲ့ရော လက်နက်ကြီးနဲ့ရော ကူပစ်ပေးနေတာလေ။ ကျနော်တို့ဘက်ကတော့ ထိခိုက်မှု မရှိဘူး။ တိုက်ပွဲကတော့ နှစ်ဖက်လုံး စစ်ရေးတင်းမာနေတဲ့ အခြေအနေမျိုးတော့ ရှိတယ်” လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
စစ်တပ်ဘက်က ဒရုန်း၊ လက်နက်ကြီးနဲ့ ပစ်ကူတာ ရှိပေမဲ့ တော်လှန်ရေး ရဲဘော်တွေက နေရာယူထားတာကြောင့် ထိခိုက်တာ မရှိဘူးလို့လည်း ထုတ်ပြန်ချက်ထဲ ဖော်ပြထားပါတယ်။
စစ်တပ်ဘက်က ၅ ဦးထက်မနည်း ဒဏ်ရာရရှိခဲ့ပြီး အထိနာခဲ့တာကြောင့် ရှေ့ဆက် မတိုးတော့ဘဲ ပြန်ဆုတ်သွားခဲ့တာလို့ ဆိုပါတယ်။
စစ်တပ်ဟာ ညောင်လေးပင်မြို့နယ်က ကျေးရွာတွေဘက် စစ်ကြောင်းထိုးပြီး ဒေသခံရဲ့ နေအိမ်တွေကို မီးရှို့ဖျက်ဆီးတာတွေ ပြုလုပ်နေပါတယ်။
