ရွှေဖီမြေ၊ ဧပြီ ၂၀ ရက်၊ သပိတ်ကျင်း
မနေ့ ဧပြီ ၁၉ ရက် မန္တလေးတိုင်း သပိတ်ကျင်းမြို့နယ် ရေထွက်ရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ သေဆုံးသူ ၃၀ ထက်မနည်း ရှိလာပြီဖြစ်တယ်လို့ မြေပြင်မှာ ရှိနေသူ ဒေသခံတစ်ဦးက ရွှေဖီမြေကို ပြောပါတယ်။
ဒီမနက်မှာဘဲ ပျက်စီးနေတဲ့ နေအိမ်ကြားထဲက အလောင်း ၃ လောင်း ထပ်မံ တွေ့ရှိခဲ့တယ်လို့ ဆိုပါတယ်။
“မနေ့ညအထိ ၂၇။ ဒီမနက် ၃ ယောက် ထပ်တွေ့တာဆိုတော့ ၃၀ ကွက်တိပဲ။ အဲထက်တော့ မနည်းဘူး။ ဒဏ်ရာရကတော့ ၂၅ ကျော်တယ်။ ကျန်တာတော့ အခုထိ ရှာနေတုန်း”
ရှာဖွေမှု လုပ်နေစဉ်အတွင်း ရေထွက်ရွာကို ဒီနေ့ ဧပြီ ၂၀ ရက် နေ့လယ် ၁ နာရီခွဲခန့်မှာ လေကြောင်း တိုက်ခိုက်မှု ထပ်မံ ပြုလုပ်ခဲ့ပေမဲ့ ထိခိုက်မှုတော့ မရှိဘူးလို့ ဆိုပါတယ်။
ဒါ့အပြင် ပြီးခဲ့တဲ့ ဧပြီ ၁၈ ရက်က ဗုံးကြဲတိုက်ခိုက်လို့ လူ ၁၃ ဦး သေဆုံးခဲ့တဲ့ လိပ်ကျရွာကိုလည်း ဒီနေ့ ထပ်မံ ဗုံးကြဲတိုက်ခိုက်ခဲ့တယ်လို့ ဆိုပါတယ်။
လိပ်ကျနဲ့ရေထွက်ရွာတစ်ဝိုက်ကို ပြီးခဲ့တဲ့ ဧပြီ ၁၃ ရက်ကနေ ဒီနေ့ ၂၀ ရက်အထိ လေကြောင်း တိုက်ခိုက်မှု ၁၇ ကြိမ်အထိ ရှိလာပြီဖြစ်တယ်လို့ ဆိုပါတယ်။
လက်ရှိ အဲဒီအနီးပတ်ဝန်းကျင်က ကျေးရွာခံတချို့ဟာ ဘေးလွတ်ရာ ပြေးနေကြပြီး လေကြောင်း သတိပေးချက်လည်း ပိုမိုလုပ်ဆောင်လာနေကြတယ်လို့ ဆိုပါတယ်။
