ပျားကြီး၊ ဧပြီ ၂၀ ရက်၊ မန္တလေး
စစ်ကောင်စီက ဧရာဝတီမြစ်ကူးတံတား ရတနာပုံကို ကုန်တင်ယာဉ်ကြီးနဲ့ ဆီသယ်ယာဉ်တွေ ဖြတ်သန်းခွင့် ပိတ်လိုက်တာကြောင့် တွဲသင်္ဘောနဲ့ မြစ်ဖြတ်ကူးနေရပြီး ကားတစ်စီးကို မြစ်ကူးခအဖြစ် ၁ သိန်းခွဲအထိ တောင်းယူနေတယ်လို့ ဒေသခံယာဉ်မောင်းတွေက ပြောပါတယ်။
စစ်ကိုင်းငလျင်ဒဏ်ကြောင့် ချဉ်းကပ်လမ်း အက်ကွဲမှုတချို့ ရှိခဲ့ပြီး ကြံ့ခိုင်မှု သိပ်မကောင်းတော့တဲ့ ရတနာပုံတံတားကို မတ်လ ၂၈ ရက် ညနေပိုင်းကတည်းက ကုန်တင်ယာဉ် ဖြတ်သန်းခွင့် ပိတ်ပစ်ခဲ့တာပဲ ဖြစ်ပါတယ်။
စစ်ကိုင်းဒေသခံ ယာဉ်မောင်းတစ်ဦးက “၉ ရက်လောက်အထိ ပိတ်မိနေတာ။ လုံးဝ ပေးမဖြတ်ဘူး။ သင်္ကြန်မတိုင်ခင်ကမှ ဇက်တွေနဲ့ ပေးဖြတ်တာ။ ဇက်ကူးခက အရမ်းများတယ်။ ဒါပေမဲ့လည်း ဒီတစ်လမ်းပဲရှိတော့ သွားရမှာပဲ” လို့ ပြောပါတယ်။
ရတနာပုံတံတား မြောက်ဖက်အနီးမှာ ယာယီလမ်း ဖောက်လုပ်ပြီး ကုန်တင်ယာဉ်နဲ့ စက်သုံးဆီတင်ယာဉ်တွေအတွက် ဇက်ဆိပ် ပြုလုပ်ပေးထားပြီးတော့ တွဲသင်္ဘော ၈ စီးနဲ့ စစ်ကိုင်းဖက်ကမ်းနဲ့ မန္တလေးဖက်ကမ်းကို အသွားအပြန် သယ်ယူပို့ဆောင်ပေးနေတာလို့ ယာဉ်မောင်းတွေက ပြောဆိုပါတယ်။
စစ်ကိုင်းနဲ့ မန္တလေးမြို့ကို အသွားအပြန် ကူးသန်းနေတဲ့ ကုန်တင်ယာဉ်ကြီးတွေဟာ နေ့စဉ် အစီးရေ ၅၀၀ ကနေ ၁ ထောင်ကြားအထိရှိပြီး ဇက်ဆိပ်အနီးက ငလျင်ဒဏ်ကြောင့် ပြိုကျပျက်စီးခဲ့တဲ့ ရွှေကြက်ကျဘုရား ပြုပြင်ဖို့အပါအဝင် အလှူခံဖြတ်ပိုင်းမျိုးစုံနဲ့ ငွေကြေး တောင်းခံမှုကိုလည်း မဖြစ်မနေ ထည့်ဝင်ပေးနေရတာကြောင့် အပိုကုန်ကျမှု များနေတဲ့အပေါ် စိတ်ပျက်နေကြတယ်လို့ ယာဉ်မောင်းတွေက ပြောပါတယ်။
အခုလို ကုန်တင်ယာဉ်နဲ့ ဆီသယ်ယာဉ်တွေကို မြစ်ကူးခ သိန်းဂဏန်း တောင်းယူမှုကြောင့် လက်ရှိအချိန်မှာ ကုန်ဈေးနှုန်း မြှင့်တက်လာနေပြီး တရားဝင် စက်သုံးဆီဈေးနှုန်းဟာလည်း မန္တလေးနဲ့စစ်ကိုင်းဖက်ခြမ်း ကွာဟမှုက တစ်လီတာကို ကျပ် ၃၀၀ ကနေ ၅၀၀ အထိ ရှိလာတယ်လို့ သိရပါတယ်။
