မိုင်းရူပ၊ ဧပြီ ၁၉ ရက်၊ သပိတ်ကျင်း
မန္တလေးတိုင်း သပိတ်ကျင်းမြို့နယ်ရှိ ရေထွက်ကျေးရွာမှာ စစ်ကောင်စီတပ်ရဲ့ လေကြောင်း တိုက်ခိုက်မှုကြောင့် ကလေးငယ်အပါအဝင် အရပ်သား ၁၃ ဦး သေဆုံးခဲ့တယ်လို့ ပြည်သူ့ကာကွယ်ရေးတပ်ဖွဲ့- သပိတ်ကျင်းမြို့နယ်က ထုတ်ပြန်ထားပါတယ်။
ဒီနေ့ ဧပြီ ၁၉ ရက် နေ့လယ် ၁ နာရီခန့်မှာ ရေထွက်ရွာကို ဂျက်လေယာဥ်နဲ့ ပေါင် ၂၀၀ ဗုံး ကြဲချခဲ့ရာ ကလေးငယ်အပါအဝင် အရပ်သား အစုလိုက် အပြုံလိုက် သေဆုံးခဲ့တာလို့ ဆိုပါတယ်။
ဗုံးကြဲခဲ့တဲ့နေရာဟာ လူစုလူဝေး နေထိုင်တဲ့ကျေးရွာ ဖြစ်တာကြောင့် ထိခိုက်သေဆုံးမှု များရတာလို့ မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
“လူစုလူဝေးများတဲ့နေရာကို ကြဲတာ။ အဲကြောင့်မို့ ထိခိုက်မှု များတာ။ အရပ်သားတွေချည်းပဲ။ ဒဏ်ရာရသူတွေလည်း အများကြီးပဲ”
သေဆုံးသူတွေထဲ ခန္ဓကိုယ်အပိုင်းအစ ဖြစ်သွားတဲ့ အမျိုးသမီးနဲ့ ကလေးတွေလည်း တွေ့ရပါတယ်။
မနေ့ ဧပြီ ၁၈ ရက် မနက်ပိုင်းမှာ သပိတ်ကျင်းမြို့နယ် လိပ်ကျရွာကို ဂျက်လေယာဥ်နဲ့ ဗုံးကြဲတိုက်ခိုက်ခဲ့တာဖြစ်ပြီး ကလေးအပါအဝင် အရပ်သား ၁၂ ဦးထက်မနည်း သေဆုံးခဲ့ပြီး နှစ်ရက်အတွင်း စစ်ကောင်စီ လေတပ်ကြောင့် အရပ်သား ၃၀ နီးပါး သေဆုံးခဲ့ပါတယ်။
ဒါ့အပြင် မနေ့ နေ့လယ် ၃ နာရီဝန်းကျင်မှာ စဥ့်ကူးမြို့နယ် ကျည်တောက်ပေါက်ရွာ စာသင်ကျောင်းကို ဗုံးကြဲချခဲ့ရာ ဒဏ်ရာရသူ ၆ ဦးနဲ့ နေအိမ်အများစု ပျက်စီးခဲ့တယ်လို့ သိရပါတယ်။
၃ ပတ်ကြာ အပစ်ရပ်မယ်လို့ ထုတ်ပြန်ထားတဲ့ စစ်တပ်ဟာ နိုင်ငံတဝန်းမှာ လေကြောင်းတိုက်ခိုက်မှု ဆက်လက် လုပ်ဆောင်နေပြီး အရပ်သား သေဆုံးမှု ဆက်လက် မြှင့်တက်နေပါတယ်။
