ရွှေဖီမြေ၊ ဧပြီ ၁၉ ရက်၊ သပိတ်ကျင်း
မနေ့ ဧပြီ ၁၈ ရက်က လိပ်ကျရွာကို လေကြောင်းကနေ ဗုံးကြဲလို့ လူအစုလိုက် အပြုံလိုက် သေဆုံးပြီးနောက် ဒီနေ့ ဧပြီ ၁၉ ရက်မှာလည်း လိပ်ကျရွာအနီး ရေထွက်ရွာ စျေးထဲကို လေကြောင်းကနေ ဗုံး ထပ်ကြဲလို့ ကလေးငယ်အပါအဝင် လူအစုလိုက် အပြုံလိုက် ထပ်မံ သေဆုံးခဲ့တယ်လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
ဒီနေ့ နေ့လယ် ၁ နာရီခွဲခန့်မှာ ဂျက်ဖိုက်တာနဲ့လာရောက် ပစ်ခတ်ခဲ့တာလို့ ဆိုပါတယ်။
“ဒီနေ့ကတော့ မနေ့ကထက် သေမယ်ထင်တယ်။ ပစ်တဲ့နေရာက စျေးနေရာ ဖြစ်နေတာ။ အိမ်တွေကော မီးလောင်တယ်။ အလောင်းက ၁၀ လောင်းလောက်ပဲ ရသေးတယ်။ အောက်မှာ အများကြီး ကျန်အုံးမယ်။ ဘိလပ်မြေဆိုင်ဆို အကုန်မီးလောင်တော့ တစ်အိမ်သားလုံး သေမယ်ထင်တယ်။ အခုနေရာက စျေးနေရာဆိုတော့ လူစည်တယ်”
သေဆုံးသူတွေထဲ ကလေးငယ်လည်း ပါဝင်ပြီး သေဆုံးသူဦးရေ အတိအကျကတော့ လောလောဆယ် မသိနိုင်သေးဘူးလို့ ဆိုပါတယ်။
“မနေ့က အပစ်ခံရတဲ့နေရာနဲ့ဆို ၅ မိနစ်ပဲ ဆိုင်ကယ် မောင်းရတယ်။ ဒီနေ့ လာပစ်တာလည်း တစ်စီးတည်းပဲ။ ဒါပေမဲ့ အိမ်တွေအများကြီး မီးလောင်တယ်။ ထိခိုက်မှုလည်း ပိုများတယ်။ မနေ့က အသုဘတောင် ကောင်းကောင်း မပြီးသေးဘူး”
မနေ့ ဧပြီ ၁၈ ရက်က လိပ်ကျရွာကို ဗုံးကြဲမှုမှာ ဒေသခံ ၁၃ ဦးထက်မနည်း သေဆုံးခဲ့ပါတယ်။
စစ်ကောင်စီတပ်ဟာ သပိတ်ကျင်းမြို့နယ်ကို နေ့စဉ်ဆက်တိုက်ဆိုသလို လေကြောင်းကနေ ဗုံးအပြင်းအထန် ကြဲချပြီး တိုက်ခိုက်နေတာပဲ ဖြစ်ပါတယ်။
