အိုက်ပွီး၊ ဧပြီ ၁၉ ရက်၊ ကျောက်တော်
အာရက္ခတပ်တော်- AA ထိန်းချုပ်ထားတဲ့ ရခိုင်ပြည်နယ် ကျောက်တော်မြို့ကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်လို့ အရပ်သားတစ်ဦး သေဆုံးပြီး ၂၀ ဦးထက်မနည်း ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။
ဒီနေ့ ဧပြီ ၁၉ရက် မနက် ၂ နာရီခွဲခန့်မှာ ကျောက်တော်မြို့ ပြည်တော်သာရပ်ကွက်၊ မြို့သစ်ရပ်ကွက်၊ ရှမ်းရွာရပ်ကွက်၊ ကတ ၆ လမ်း၊ ၇ လမ်း၊ ၈ လမ်း စတဲ့နေရာတွေကို လေကြောင်းကနေ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
“လူအိပ်မောကျနေတဲ့အချိန်မှာ ဗုံးကြဲသွားတာပါ။ ဗုံးအမျိုးအစားကိုတော့ မသိဘူး။ အသံတော့ တစ်မြို့လုံး မြေကြီးပါ တုန်ခါသွားတယ်။ ဗုံးသီး လေးလုံးထင်တယ်။ အသံအကျယ်ကြီး လေးကြိမ် ကြားရတယ်။ ပြီးတော့ ရော့ကတ်ဒုံး ပစ်သံတွေလည်း ကြားရတယ်” လို့ ကျောက်တော်မှ သတင်းအရင်းအမြစ်က ရွှေဖီမြေသို့ ပြောပါတယ်။
လေကြောင်းကနေ ဗုံးကြဲတိုက်ခိုက်လို့ ကတလမ်း ၆ မှာ နေထိုင်တဲ့ အသက် ၃၈ နှစ်အရွယ် ဦးကျော်ဇောချေခေါ် မောင်ငယ်ဟာ ပွဲချင်းပြီး သေဆုံးခဲ့ပါတယ်။
ဒါ့အပြင် တခြားမြို့နယ်ကနေ ကျောက်တော်မြို့ဘက် စစ်ဘေး ရှောင်လာတဲ့ စစ်ဘေးရှောင်အပြင် ကျောက်တော်မြို့ဒေသခံ အမျိုးသမီးနဲ့ ကလေးငယ်အပါအဝင် ၂၀ ဦးထက်မနည်း ထိခိုက်ဒဏ်ရာ ရရှိခဲ့တယ်လို့ သိရပါတယ်။
“မောင်တော၊ ဘူးသီးတောင်ဘက်က ကျောက်တော်မှာ စစ်ဘေးရှောင်တဲ့သူတွေလည်း ထိခိုက်ဒဏ်ရာ ရတယ်။ ဒဏ်ရာရတဲ့ထဲ ၄ နှစ်၊ ၅ နှစ်၊ ၉ နှစ် စတဲ့ကလေးငယ်တွေပါတယ်။ အမျိုးသမီးတွေလည်း ပါတယ်။ စိုးရိမ်ရတဲ့သူတွေလည်း ရှိပါတယ်” လို့ ကျောက်တော်မြို့ခံတစ်ဦးက ရွှေဖီမြေသို့ ပြောပါတယ်။
ဒဏ်ရာ ရရှိသူတွေထဲ အသက်အန္တရာယ် စိုးရိမ်ရတဲ့ လူနာတွေလည်း ပါဝင်တယ်လို့ သိရပါတယ်။
ဒီနေ့မနက်မှာ လေကြောင်းနဲ့ တိုက်ခိုက်ခဲ့လို့ အစိုးရအဆောက်အဦးအပါအဝင် အရပ်သားနေအိမ် အများစုလည်း ပျက်စီးသွားတယ်လို့ သိရပါတယ်။
ဧပြီ ၁၃ ရက်ကလည်း ကျောက်တော်မြို့ ရွာမရပ်ကွက်ကို လေကြောင်းကနေ ဗုံးကြဲတိုက်ခိုက်လို့ အမျိုးသမီးသုံးဦး ထိခိုက်ဒဏ်ရာ ရရှိပြီး လူနေအိမ်တချို့ ပျက်စီးသွားပါတယ်။
