ရွှေဖီမြေ၊ ဧပြီ ၁၈ ရက်၊ သပိတ်ကျင်း
ဒီနေ့ ဧပြီ ၁၈ ရက် မနက် ၁၁ နာရီခန့်မှာ မန္တလေးတိုင်း သပိတ်ကျင်းမြို့နယ် ကွင်းသုံးဆယ်လမ်းဆုံ လိပ်ကျရွာထဲ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ လူ ၁၀ ဦးထက်မနည်း အစုလိုက် အပြုံလိုက် သေဆုံးပြီး အများစု ဒဏ်ရာ ရခဲ့တယ်လို့ ရွှေဖီမြေက စုံစမ်းသိရှိရပါတယ်။
“ပစ်တာကတော့ လမ်းစုံနေရာကို ပစ်တာ။ ချက်ချင်း လာပြီးတော့ ချက်ချင်းပစ်တာ။ ဘယ်သူမှ ရှောင်ချိန် မရလိုက်ဘူး။ အဲမှာတည့်တည့်ကျတော့ လမ်းသွားလမ်းလာ ၃ ယောက် ပွဲချင်းသေတယ်။ ပြီးတော့ အောင်မြင့်မိုလ် ဆိုင်ကယ်ပစ္စည်းဆိုင်ထဲ ကျတော့ ဆိုင်ရှင်နဲ့ သူ့သမီးတွေဆို အကုန်သေတယ်။ ဒဏ်ရာကတော့ အယောက် ၂၀ ကျော်တယ်” လို့ မျက်မြင်တွေ့ရှိသူ ဒေသခံတစ်ဦးက ပြောပါတယ်။
ပြီးခဲ့တဲ့ ဧပြီ ၁၆ ရက်ကလည်း လိပ်ကျရွာကို ဂျက်ဖိုက်တာနဲ့ ဗုံးကြဲခဲ့ပေမဲ့ ထိခိုက်မှု မရှိတာကြောင့် နောက်တစ်ကြိမ် လာရောက် ပစ်ခတ်ခဲ့တာပဲ ဖြစ်ပါတယ်။
“အဲမှာက ရွှေစိုက်တွေရှိလို့ လာပစ်တာဖြစ်မယ်။ သင်္ကြန်အတွင်း နေ့တိုင်းကို လာပစ်တာ။ တစ်ရက် ၂ ခါ ၃ ခါအထိ လာပစ်တာ။ အရင်ကတော့ တစ်ပတ်တစ်ခါလောက်ပဲ။ မထိဖူးဘူး။ အခုမှ အစုလိုက် အပြုံလိုက် ထိတာ” ဆိုပြီး ၎င်းက ဆက်ပြောပါတယ်။
ဒီနေ့ညနေပိုင်း ၅ နာရီမှာလည်း စစ်တပ်က ဗုံး ထပ်ကြဲခဲ့ပေမဲ့ အထိအခိုက်တော့ မရှိဘူးလို့ ဆိုပါတယ်။
