ပျားကြီး၊ ဧပြီ ၁၆ ရက်၊ အရာတော်
စစ်ကိုင်းတိုင်း အရာတော်မြို့နယ်မှာ စစ်ကောင်စီတပ်က တိုက်ပွဲဖြစ်ပွားတာမရှိဘဲ လေကြောင်းနဲ့ တိုက်ခိုက်ခဲ့တာကြောင့် ၁ ဦး သေဆုံးပြီး ဒဏ်ရာရသူ ၇ ဦးထက်မနည်း ရှိခဲ့တယ်လို့ ဒေသခံတွေက ပြောပါတယ်။
ဒီနေ့ ဧပြီ ၁၆ ရက် သင်္ကြန်အတက်နေ့ မနက် ၁၀ နာရီခန့်က အရာတော်မြို့နယ် တောင်ပိုင်းက ကျေးရွာ ၂ ရွာကို အကြောင်းမဲ့ ဗုံးကြဲတိုက်ခိုက်ခဲ့တာဖြစ်ပြီး ရေကစားနေသူ ကလေးငယ်အနီး ကျရောက်ပေါက်ကွဲခဲ့တာပါ။
“ကလေးတွေ ရေကစားနေတဲ့နား ကျတာ။ အိမ်တွေလည်း ထိတယ်။ ဒဏ်ရာရတဲ့သူတွေလည်း ရှိတယ်” လို့ ဒေသခံအမျိုးသားတစ်ဦးက ပြောပါတယ်။
နေ့လယ်ပိုင်းအထိ လေယာဉ်တွေဟာ ဒေသတွင်း ပျံဝဲမှု ဆက်ရှိနေသေးတာကြောင့် လုံခြုံရေးအခြေအနေအရ ဗုံးကြဲတိုက်ခိုက်ခံခဲ့ရတဲ့ ကျေးရွာအမည်တွေကိုတော့ မဖော်ပြဖို့ ဒေသခံတွေက တားမြစ်ခဲ့ပါတယ်။
ဒါ့အပြင် သင်္ကြန်ကာလတစ်လျှောက်လုံး စစ်တပ်ဟာ အရာတော်မြို့နယ်အတွင်း လက်နက်ကြီးနဲ့ ဆက်တိုက် ပစ်ခတ်နေတာကြောင့် ကျေးရွာ ၄ ရွာက ဒေသခံတွေဟာ ဘေးလွတ်ရာ ထွက်ပြေးတိမ်းရှောင်နေရတယ်လို့ ဒေသခံတွေက ပြောဆိုပါတယ်။
