မိုင်းရူပ၊ ဧပြီ ၁၄ ရက်၊ သပိတ်ကျင်း
သင်္ကြန်အကြိုနေ့မှာ မန္တလေးတိုင်း သပိတ်ကျင်းမြို့နယ် ချောင်းကြီးရွာကို စစ်ကောင်စီတပ်က ဗုံးကြဲတိုက်ခိုက်ခဲ့ရာ အရပ်သား ၂ ဦး သေဆုံးပြီး ၈ ဦး ဒဏ်ရာ ရခဲ့တယ်လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
မနေ့ ဧပြီ ၁၃ ရက် ည ၁၀ နာရီဝန်းကျင်မှာ ချောင်းကြီးရွာကို ဂျက်ဖိုက်တာ ၂ စီး အသုံးပြုပြီး ဗုံး ၄ လုံး ကြဲချတိုက်ခိုက်ခဲ့ရာ အမျိုးသားတစ်ဦးနဲ့ အမျိုးသမီးတစ်ဦးသေဆုံးပြီး ၈ ဦး ဒဏ်ရာ ရခဲ့ပါတယ်။
“၁၀ နာရီ ၁၄ မိနစ်မှာတစ်ကြိမ်၊ ၁၀ နာရီ ၂၄ မိနစ်မှာတစ်ကြိမ် ဂျက်ဖိုက်တာ ၂ စီးနဲ့ လာကြဲတာ။ လင်မယား ၂ ဦး သေသွားတယ်။ ဒဏ်ရာ ရတဲ့သူက ၈ ယောက် ရှိမယ်” လို့ အခင်းဖြစ်ပွားစဥ် မြေပြင်မှာ ရှိနေသူတစ်ဦးက ရွှေဖီမြေကို ပြောပါတယ်။
ဗုံးကြဲတိုက်ခိုက်မှုကြောင့် နေအိမ် ၁၄ လုံးနဲ့ ကားတချို့ ပျက်စီးခဲ့ပြီး ချောင်းကြီးရွာကို အခုလို ဗုံးကြဲတိုက်ခိုက်တာ ၄ ကြိမ် ရှိပြီလို့ သူက ဆက်ပြောပါတယ်။
စစ်တပ်ဟာ ဧပြီ ၂ ရက်ကနေ ဧပြီ ၂၂ ရက်အထိ ၃ ပတ်ကြာ အပစ်ရပ်မယ်လို့ ကြေညာထားပေမဲ့ စစ်ကိုင်း၊ မန္တလေးနဲ့ ရှမ်းမြောက်မှာ လေကြောင်းနဲ့တိုက်ခိုက်တာ ထိုးစစ်ဆင်တာတွေ ပြုလုပ်နေပါတယ်။
မနေ့ ဧပြီ ၁၃ ရက် နေ့လယ် ၁၂ နာရီဝန်းကျင်မှာ စစ်ကိုင်းတိုင်း ကောလင်းမြို့နယ် ညောင်ကုန်းရွာရှိ ဆီဆိုင်ကို ဂျက်လေယာဥ်နဲ့ ဗုံးကြဲတိုက်ခိုက်ခဲ့ပြီး အမျိုးသားတစ်ဦးနဲ့ အမျိုးသမီးတစ်ဦး ထိခိုက်ဒဏ်ရာ ရခဲ့ပါတယ်။
ဒါ့အပြင် ဧပြီ ၁၂ ရက်မှာလည်း စစ်ကိုင်းတိုင်း ဒီပဲယင်းမြို့နယ် ကျခတ်ရွာ ဘုန်းကြီးကျောင်းကို လေကြောင်းနဲ့ ဗုံးကြဲတိုက်ခိုက်ရာ ကိုရင်တွေအပါအဝင် ၆ ဦး သေဆုံးခဲ့ပါတယ်။
စစ်ကောင်စီတပ်ဘက်ကတော့ အရပ်သားတွေကို လေကြောင်း အသုံးပြုကာ တိုက်ခိုက်တာနဲ့ ပတ်သက်ပြီး တစ်စုံတစ်ရာ တုန့်ပြန်ထားတာ မရှိသေးပါဘူး။
