မိုင်းရူပ၊ ဧပြီ ၁၃ ရက်၊ ကောလင်း
စစ်ကိုင်းတိုင်း ကောလင်းမြို့နယ်အရှေ့ခြမ်း ညောင်ကုန်းရွာ လေကြောင်းနဲ့ တိုက်ခိုက်ခံရပြီး အရပ်သား ၂ ဦး ဒဏ်ရာ ရခဲ့တယ်လို့ မြေပြင်အခြေအနေ သိရှိသူတွေက ရွှေဖီမြေကို ပြောပါတယ်။
ဒီနေ့ ဧပြီ ၁၃ ရက် နေ့လယ် ၁၂ နာရီဝန်းကျင်မှာ ညောင်ကုန်းရွာရှိ ဆီဆိုင်ကို ဂျက်လေယာဉ်နဲ့ ဗုံးကြဲတိုက်ခိုက်ခဲ့တာဖြစ်ပြီး အမျိုးသားတစ်ဦးနဲ့ အမျိုးသမီးတစ်ဦး ဒဏ်ရာ ရခဲ့တယ်လို့ မြေပြင်သတင်း ရရှိထားတဲ့ Kawlin Info ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
“တိုက်ပွဲ မရှိပါဘူး။ အကြောင်းမဲ့သက်သက် ပစ်သွားတာပါ။ ကောလင်းမှာ မြို့ပျက်တော့ စစ်ရှောင်နေတဲ့ ပြည်သူတွေ ဆီအရောင်းအဝယ် လုပ်တဲ့နေရာ ပစ်သွားတာ။ ကျားတစ်ဦး၊ မတစ်ဦး ဒဏ်ရာ ရတယ်”
လေကြောင်း တိုက်ခိုက်မှုကြောင့် ဆီဆိုင်အပါအဝင် နေအိမ်တချို့လည်း မီးလောင်ပျက်စီးခဲ့တယ်လို့ သိရပါတယ်။
စစ်တပ်ဟာ ဧပြီ ၂ ရက်ကနေ ဧပြီ ၂၂ ရက်အထိ ၃ ပတ်ကြာ အပစ်ရပ်မယ်လို့ ကြေညာထားပေမဲ့ တော်လှန်ရေး အင်အားစုတွေ ထိန်းချုပ်ဒေသကို လေကြောင်းနဲ့ တိုက်ခိုက်တာ ထိုးစစ်ဆင်တာတွေ ပြုလုပ်နေပါတယ်။
ပြီးခဲ့တဲ့ ဧပြီ ၁၁ ရက်မှာ ကောလင်းမြို့နယ် လျှော်ဖြူကုန်းရွာကိုလည်း လေယာဉ်နဲ့ ဗုံးကြဲတိုက်ခိုက်ခဲ့ပြီး အမျိုးသမီးတစ်ဦး သေဆုံးခဲ့ပါတယ်။
ဒါ့အပြင် မနေ့ ဧပြီ ၁၂ ရက်မှာလည်း စစ်ကိုင်းတိုင်း ဒီပဲယင်းမြို့နယ် ကျခတ်ရွာ ဘုန်းကြီးကျောင်းကို လေကြောင်းနဲ့ ဗုံးကြဲတိုက်ခိုက်ခဲ့ရာ ကိုရင်တွေအပါအဝင် သေဆုံးသူ ၆ ဦးအထိ ရှိခဲ့ပါတယ်။
အရပ်သားတွေကို ဦးတည်ပြီး လေကြောင်း အသုံးပြုကာ တိုက်ခိုက်ခဲ့တာနဲ့ ပတ်သက်ပြီး စစ်ကောင်စီဘက်က တစ်စုံတစ်ရာ တုန့်ပြန်ထားတာ မရှိသေးပါဘူး။
