ကောလင်းမြို့ လျှော်ဖြူကုန်းရွာ လေကြောင်းနဲ့ ထပ်မံ တိုက်ခိုက်ခံရ၊ စစ်ရှောင်အမျိုးသမီး ၂ ဦး သေဆုံး

ခိုင်လေး၊ ဧပြီ ၁၁ ရက်၊ ကောလင်း

‎စစ်ကိုင်းတိုင်း ကောလင်းမြို့ တောင်ဘို့လှအုပ်စု လျှော်ဖြူကုန်းရွာကို စစ်ကောင်စီတပ်က ဂျက်ဖိုက်တာနဲ့ ထပ်မံ ဗုံးကြဲတိုက်ခိုက်ခဲ့တာကြောင့် စစ်ရှောင်အမျိုးသမီး ၂ ဦးသေဆုံးခဲ့တယ်လို့ Kawlin Info က ထုတ်ပြန်လာပါတယ်။

‎ဒီနေ့ နေ့လယ် ၃ နာရီခွဲက ဂျက်ဖိုက်တာနဲ့ နှစ်ကြိမ် တိုက်ခိုက်ခဲ့ပြီး တစ်ကြိမ်ကို ဗုံး ၂ လုံး ကြဲချတိုက်ခိုက်ခဲ့တယ်လို့ ကောလင်း ဒေသခံတစ်ဦးက ရွှေ‌ဖီမြေကို ပြောပါတယ်။

‎”စစ်ရှောင်နေအိမ် တစ်လုံးပေါ် ကျတာ။ ၅၆ နှစ်အရွယ်ရှိတဲ့ အမျိုးသမီးတစ်ဦးက ပွဲချင်းပြီး သေသွားတယ်။ နောက် အသက် ၄၀ ဝန်းကျင်ရှိတဲ့ အမျိုးသမီးက ဆေးရုံသွားပို့ရင်း လမ်းမှာတင် သေဆုံးသွားတာ။ နေအိမ်တစ်လုံး မီးလောင်ဆုံးရှုံးခဲ့တယ်”

‎အင်း‌တော်မြို့ကို စစ်တပ်က ဧပြီ ၇ ရက်ညနေပိုင်းမှာ လက်လွှတ်လိုက်ရတာကြောင့် အင်းတော်အနီးတစ်ဝိုက်က ကျေးရွာတွေကို လေကြောင်းနဲ့ ဆက်တိုက် ဗုံးကြဲတိုက်ခိုက်နေတာပဲ ဖြစ်ပါတယ်။

‎ဒီနေ့မနက်အစောပိုင်းကလည်း စစ်တပ်က လေကြောင်းနဲ့ ပေါင် ၅၀၀ ဗုံး ၂ လုံး ကြဲချတိုက်ခိုက်ခဲ့ရာ တစ်လုံးသာ ပေါက်ကွဲပြီး ကျန်တစ်လုံးက မပေါက်ကွဲသေးဘူးလို့ ဆိုပါတယ်။

‎မနေ့ ဧပြီ ၁၀ ရက်က ကောလင်းမြို့ အင်ပင်လှရွာ စာသင်ကျောင်းကို စစ်တပ်က ဗုံးကြဲတိုက်ခိုက်ခဲ့တာကြောင့် ၁၄ နှစ်အရွယ် စစ်ရှောင်အမျိုးသမီးတစ်ဦး သေဆုံးပြီး ၃ ဦး ဒဏ်ရာ ရခဲ့ပါတယ်။

‎အလားတူ ပြီးခဲ့တဲ့ ဧပြီ ၉ ရက်ကလည်း ဝန်းသိုမြို့နယ် နမ့်ခမ်းရွာကို လေကြောင်းနဲ့ ဗုံးကြဲတိုက်ခိုက်ခဲ့တာကြောင့် ကလေးငယ်အပါအဝင် ၂၆ ဦး သေဆုံးခဲ့ပါတယ်။

Shwe Phee Myay YouTube

Shwe Phee Myay Telegram