ရွှေဖီမြေ၊ ဧပြီ ၁၀ ရက်
တအာင်းအမျိုးသား လွတ်မြောက်ရေးတပ်မတော် – PSLF / TNLA ထိန်းချုပ်ဒေသက လျှပ်စစ်မီးရတဲ့ မြို့တွေမှာ မီးတာခတွေကို သတ်မှတ်ထားတဲ့ အခွန်ဈေးနှုန်းအတိုင်း ကောက်ခံမှာဖြစ်တယ်လို့ PSLF / TNLA သတင်းနဲ့ ပြန်ကြားရေးဌာနက မနေ့ ဧပြီ ၁၀ ရက်နေ့မှာ ထုတ်ပြန်ထားပါတယ်။
ပြီးခဲ့တဲ့ မတ်လ ၆ ရက်က ပလောင်ပြည်နယ်လွတ်မြောက်ရေးတပ်ဦးPSLF/TNLA ဗဟိုဌာနချုပ်ရုံးမှ ပြုလုပ်ခဲ့တဲ့ လျှပ်စစ်လုပ်ငန်းညှိနှိုင်းအစည်းအဝေး သဘောတူဆုံးဖြတ်ချက်အရ TNLA ထိန်းချုပ်ထားတဲ့ ဒေသမှာ လျှပ်စစ်ဓါတ်အားခ နှုန်းတွေကို ပြင်ဆင်သတ်မှတ်လိုက်ပြီး ဖြစ်ပါတယ်။
လျှပ်စစ်လုပ်ငန်းညှိနှိုင်းအစည်းအဝေး ဆုံးဖြတ်ချက်အရ အိမ်သုံးမီတာရိုးရိုး ၁ ယူနစ် အနိမ့်ဆုံး ကျပ် ၅၀ မှ ကျပ် ၃၀၀၊ စက်မှုလုပ်ငန်းသုံးမီတာ ၁ ယူနစ် အနိမ့်ဆုံးကျပ်၂၅၀ မှ ကျပ် ၅၀၀ ကောက်ခံသွားမှာ ဖြစ်တယ်လို့ဆိုပါတယ်။
သတ်မှတ်ထားတဲ့ လျှပ်စစ်ဓာတ်အားခ နှုန်းတွေကို ဧပြီလ မှစပြီး ကောက်ခံသွားဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
TNLA ထိန်းချုပ်ထားတဲ့ နမ့်ဆန်၊ နမ္မတူ၊ ကွတ်ခိုင်၊ နမ့်ခမ်း စတဲ့ လျှပ်စစ်မီးရတဲ့ မြို့တွေမှာ ကောက်ခံသွားမှာ ဖြစ်ပြီး မီးမရသေးတဲ့မြို့တွေကိုလည်း လျှပ်စစ်မီးရရှိဖို့အတွက် ဆက်လက်လုပ်ဆောင်ပေးလျက်ရှိနေပါတယ်။
