ခိုင်လေး၊ ဧပြီ ၁၀ ရက်
တအာင်းတပ် – PSLF/ TNLA ထိန်းချုပ်ထားတဲ့မြို့နယ် ၅ ခုမှာ တစ်ပတ်ကျော်အတွင်း ငလျင်ဘေးသင့်ပြည်သူတွေ အတွက် အလှူငွေ ကျပ်သိန်း ၂ ထောင်ကျော် ကောက်ခံရရှိခဲ့တယ်လို့ TCSO တအာင်းအရပ်ဖက် အဖွဲ့အစည်းမှ ဒီနေ့ ဧပြီ ၁၀ရက်နေ့ ရက်စွဲနဲ့ ထုတ်ပြန်ထားပါတယ်။
တအာင်းအရပ်ဖက်အဖွဲ့အစည်းများမှ ဦးဆောင်ပြီး ပြည်တွင်း/ပြည်ပရှိ အလှူရှင်တွေနဲ့ နမ့်ဆန်မြို့၊ ကွတ်ခိုင်မြို့၊ မန်တုံမြို့၊ နမ့်ခမ်းမြို့၊ နမ္မတူမြို့ရှိ ဒေသခံပြည်သူတွေ ပူးပေါင်းလှူဒါန်းတဲ့အလှူငွေနဲ့ ငလျင်ဘေးသင့်ပြည်သူတွေကို သွားရောက်လှူဒါန်းပေးသွားမှာ ဖြစ်တယ်လို့ သိရပါတယ်။
”ဒီနေ့ထိ ကောက်ခံရရှိထားတဲ့ အလှူငွေတွေကို အလှူရှင်တွေ အရောက်နည်းတဲ့နေရာတွေမှာ သွားလှူဖို့ရှိပါတယ်။ ဘယ်နေ့လဲဆိုတော့ သေချာမသိသေးဘူး။ သင်္ကြန်ပြီးမှ ထင်တယ်။ အခုက ချိတ်ဆက်နေတုန်းပါ။ သွားရောက်လှူဒါန်း ပြီးရင်လဲ ဘယ်မှာ သွားရောက်လှူဒါန်းခဲ့တာလဲ ဆိုတာတဲ့ အချက်အလက်အသေးစိတ်ကို ကျမတို့ TCSO pageမှာ ပြန်ချပြ ဖို့ရှိတယ်လို့” TCSO မှတာဝန်ရှိသူ တစ်ဦးက ရွှေဖီမြေကို ပြောပါတယ်။
ကောက်ခံရရှိထားတဲ့ အလှူငွေတွေကိုပထမပိုင်းအနေနဲ့ အထိအခိုက်များပြီး အလှူရှင်အရောက်နည်းတဲ့ အင်းလေး၊ စစ်ကိုင်း-မင်းကွန်း၊ ပုလိပ်ရွာ နဲ့ အခြားလိုအပ်တဲ့နေရာတွေမှာ ငွေကျပ်သိန်း (၇၀၀) အသုံးပြုသွားမှာဖြစ်ပြီး စစ်ကိုင်းအနောက်ခြမ်း မတ္တရာ ဒေသတွေမှာတော့ ငွေကျပ်သိန်း (၃၀၀) အသုံး လှူဒါန်းပေးသွားမှာ ဖြစ်တယ်လို့ ဆိုပါတယ်။
ပြီးခဲ့တဲ့ မတ်လ ၂၈ ရက်နေ့မှာ ပြင်းအား ၇.၇ ချက်စကေး ရှိတဲ့ ငလျင်လှုပ်ခတ်မှုကြောင့် နမ့်ဆန်ဒေသက ပျက်စီးသွားတဲ့ အဆောင်အဦ တွေကို ပြုပြင်ဖို့ သက်ဆိုင်ရာတွေကို ငွေကျပ်သိန်း (၁၀၀) လှူဒါန်း သွားမှာ ဖြစ်တယ်လို့ သိရပါတယ်။
ဒုတိယအစီစဉ်အနေနဲ့ ရှမ်းတောင် ကလောမြို့၊ တောင်နီ၊ ပိန္ဒဲပင်ရွာ၊ စေတီကုန်း စတဲ့ဒေသတွေက ပျက်စီးဆုံးရှုံးမှု အခြေနေပေါ်မူတည်ပြီး အလှူငွေတွေကို ပြန်လည် စီမံလှူဒါန်းမှာ ဖြစ်တယ်လို့ ဆိုပါတယ်။
