အိုက်ပွီး၊ ဧပြီလ ၁၀ရက်၊ မင်းတပ်
ချင်းညီနောင်ထိန်းချုပ်ထားတဲ့ ချင်းပြည်နယ်၊ မင်းတပ်မြို့နယ်မှာ စစ်ကောင်စီ လေကြောင်းကနေ ဗုံးကြဲတိုက်ခိုက်လို့ ဓမ္မဆရာတစ်ဦးအပါအဝင် ၆ ဦး သေဆုံးခဲ့ပြီး ၉ ဦးထိခိုက်ဒဏ်ရာရရှိခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။
မနေ့ ဧပြီလ ၉ရက်နေ့၊ ည ၈ နာရီခွဲနဲ့ ၉ နာရီဝန်းကျင်မှာ မင်းတပ်မြို့နယ်၊ ဖွီကျေးရွာကို စစ်ကောင်စီတပ်က ဂျက်ဖိုက်တာတစ်စီးနဲ့ နှစ်ကြိမ်ခန့် လာရောက်ပြီး ပေါင် ၅၀၀ ဗုံးသီးနှစ်လုံးနဲ့ လေကြောင်းကနေ ဗုံးကြဲတိုက်ခိုက်ခဲ့တာဖြစ်ပါတယ်။
အဲဒီလေကြောင်း တိုက်ခိုက်မှုကြောင့် ၈ လအရွယ် ကလေးငယ် ၁ဦး၊ အသက် ၇ နှစ်အရွယ် ကလေး ၂ဦး၊ အသက် ၆၈ နှစ်အရွယ် အမျိုးသား ၁ဦး၊ အသက် ၇၂ နှစ်အရွယ် အမျိုးသမီး ၁ဦး၊ အသက် ၃၆ နှစ်အရွယ် ခရစ်ယာန် ဓမ္မဆရာ ၁ ဦးနဲ့ အသက် ၃၈ နှစ်အရွယ် မသန်စွမ်းအမျိုးသား ၁ဦးတို့ သေဆုံးခဲ့ပါတယ်။
ဒါ့အပြင် ကလေး၊ အသက်ကြီးပိုင်းအပါအဝင် ၉ ဦးလည်း ထိခိုက်ဒဏ်ရာရရှိပြီး ဆေးကုသမှု ခံယူနေရပါတယ်။
“လေယာဥ်နှစ်ကြိမ်လာပြီး ဗုံးသီးနှစ်လုံးကြဲသွားတာ။ ပထမအကြိမ် ဗုံးကြဲတုန်းက လူ ၅ယောက် သေဆုံးတယ်။ နေအိမ်တွေ မီးလောင်တယ်။ မီးလောင်နေတဲ့ နေအိမ်တွေ မီးငြိမ်သတ်ရင်း ဒုတိယအကြိမ် ဗုံးထပ်ကြဲတယ်။ ဓမ္မဆရာတစ်ဦး သေဆုံးတယ်။”လို့ မင်းတပ်မြို့နယ်ဒေသခံတစ်ဦးက ရွှေဖီမြေသို့ ပြောပါတယ်။
ဒါ့အပြင် လေကြောင်း ဗုံးကြဲတိုက်ခိုက်တာကြောင့် ဖွီကျေးရွာက ခရစ်ယာန်ဘုရားကျောင်းအပါအဝင် နေအိမ် ၁၀ လုံးထက်မနည်း မီးလောင်ပျက်စီးသွားတယ်လို့ သိရပါတယ်။
မနေ့ည ၁၂ နာရီဝန်းကျင်ကလည်း တီးတိန်မြို့နယ်၊ Saizang ကျေးရွာကို စစ်ကောင်စီလေကြောင်း ဗုံးကြဲတိုက်ခိုက်လို့ ကလေးအပါအဝင် ၆ ဦးသေဆုံးပြီး တစ်ဦးပြင်းထန်စွာ ဒဏ်ရာရရှိခဲ့ပါတယ်။
စစ်ကောင်စီဗုံးကြဲတဲ့ မင်းတပ်နဲ့ တီးတိန်မြို့နယ်မှာ တိုက်ပွဲမှ မရှိဘဲ အရပ်သားတွေနေထိုင်တဲ့ကျေးရွာတွေကို အကြောင်းမဲ့ လေကြောင်းတိုက်ခိုက်ခဲ့တာဖြစ်ပါတယ်။
