ရွှေဖီမြေ၊ ဧပြီ ၈ ရက်
စစ်ကောင်စီတပ်ဟာ ၃ ပတ်ကြာ အပစ်ရပ်မယ်လို့ ထုတ်ပြန်ထားပေမဲ့ လေကြောင်းတိုက်ခိုက်မှု၊ မြေပြင်ထိုးစစ် ဆက်လုပ်နေပြီး စစ်ကောင်စီရဲ့ အပစ်ရပ်မှုဟာ နိုင်ငံရေးအမြတ်ထုတ်လိုတဲ့ လုပ်ကြံလီဆယ်မှုလို့ မန္တလေး PDF က ထုတ်ပြန်လာပါတယ်။
အပစ်ရပ်မယ်လို့ ထုတ်ပြန်ပြီးနောက် လေကြောင်း တိုက်ခိုက်မှု ဆက်လုပ်နေပြီး စဉ့်ကူးမှာ ၂ ကြိမ်၊ မတ္တရာမှာ ၁ ကြိမ်၊ သပိတ်ကျင်းမှာ ၅ ကြိမ်၊ မိုးကုတ်မှာ ၁ ကြိမ် နဲ့ နောင်ချိုမှာ ၁ ကြိမ် လူထုတွေကို ပစ်မှတ်ထားတဲ့ လေကြောင်း တိုက်ခိုက်မှု လုပ်ခဲ့တယ်လို့ ဆိုပါတယ်။
ဒါ့အပြင် စစ်တပ်ဟာ လက်နက်ကြီး ပစ်ခတ်မှုနဲ့ မြေပြင်ထိုးစစ်တွေလည်း ဆက်လက်လုပ်ဆောင်နေတယ်လို့ ထုတ်ပြန်ချက်မှာ ဖော်ပြထားပါတယ်။
ဒါကြောင့် စစ်တပ်ရဲ့ အပစ်ရပ်မှုဟာ ငလျင်ဘေးသင့်တဲ့သူနဲ့ နိုင်ငံတကာအပေါ် နိုင်ငံရေး အမြတ်ထုတ်လိုတဲ့ လုပ်ကြံလီဆယ်မှုသာ ဖြစ်တယ်လို့ မန္တလေး PDF က ပြောဆိုပါတယ်။
စစ်တပ်ဟာ ဧပြီ ၂ ရက်ကနေ ဧပြီ ၂၂ ရက်အထိ ၃ ပတ်ကြာ အပစ်ရပ်မယ်လို့ ကြေညာထားပေမဲ့ တော်လှန်ရေး အင်အားစု ထိန်းချုပ်ဒေသကို လေကြောင်းနဲ့ တိုက်ခိုက်တာ ထိုးစစ်ဆင်တာတွေ ပြုလုပ်နေပါတယ်။
ငလျင် လှုပ်ခတ်မှု ဖြစ်ပွားပြီးနောက် စစ်ကောင်စီအပါအဝင် တိုင်းရင်းသားလက်နက်ကိုင်အဖွဲ့နဲ့ အမျိုးသားညီညွတ်ရေးအစိုးရ- NUG က ယာယီ အပစ်ရပ်ကြောင်း ထုတ်ပြောကြပေမဲ့ အပြန်အလှန် တိုက်ခိုက်မှု ဆက်ရှိနေပြီး အပြန်အလှန် စွပ်စွဲနေကြပါတယ်။
စစ်ကောင်စီရဲ့ ပြောခွင့်ရသူ ဗိုလ်ချုပ် ဇော်မင်းထွန်းကတော့ အပစ်ရပ်ပြီးနောက် တိုင်းရင်းသား လက်နက်ကိုင်အပါဝင် ပြည်သူ့ကာကွယ်ရေးတပ်- PDF တွေဟာ စစ်တပ်စခန်းတွေကို တိုက်ခိုက်နေတယ်လို့ စွပ်စွဲပြောဆိုထားပါတယ်။
