ရွှေဖီမြေ၊ ဧပြီ ၈ ရက်
ရှမ်းမြောက်က မြို့နယ် ၈ ခုမှ စံသတ်မှတ်ချက်နဲ့ ကိုက်ညီတဲ့ လူထုတွေဟာ တအာင်းအမျိုးသမီးအဖွဲ့အစည်း TWO ကခေါ်တဲ့ အသေးစား စီးပွါးရေးထောက်ပံ့ငွေကို လျှောက်ယူနိုင်ကြောင်း ဒီနေ့ ဧပြီ ၈ ရက်မှာ ထုတ်ပြန်ထားပါတယ်။
ရှမ်းမြောက်မှ မြို့နယ် ၈ ခုဖြစ်တဲ့ နမ့်ဆန်၊ မန်တုံ၊ နမ့်ခမ်း၊ နမ္မတူ၊ ကွတ်ခိုင်၊ ကျောက်မဲ၊ သီပေါ၊ လားရှိုး စတဲ့မြို့နယ်မှ စစ်ရှောင်မိသားစု၊ လက်နက်ကြီးထိထားတဲ့ အိမ်ထောင်စု၊ သဘာဝဘေးကြောင့် ထိခိုက်ခံစားရတဲ့ မိသားစု၊ စစ်ပဋိပက္ခကြောင့် စားဝတ်နေရေးခက်ခဲတဲ့ မိသားစု၊ CDMs မိသားစု၊ အမျိုးသမီးဦးဆောင်တဲ့ အိမ်ထောင်စု၊ အလုပ်အကိုင်အခွင့်အလမ်းမမှီတဲ့ မိသားစုအပြင် တခြားမိသားစုတွေလည်း လျှောက်ထားနိုင်ကြောင်း ရေးသားထားပါတယ်။
အဲထဲမှာမှ အလုပ်အကိုင်အခွင့်အလမ်းမမှီတဲ့အုပ်စု၊ အမျိုးသမီးဦးဆောင်တဲ့လုပ်ငန်းနဲ့ အိမ်ထောင်စု၊ အမှန်တကယ်လုပ်ငန်းအကောင်အထည်ဖော်ဖို့ စိတ်အားထက်သန်သူ၊ သတ်မှတ်ချက်အတိုင်းပြည့်မှီသူ စတဲ့အုပ်စုတွေကို ဦးစားပေးရွေးချယ်ပေးမယ်လို့လည်း ဆိုပါတယ်။
လျှောက်လွှာ လျှောက်မယ့်သူဟာ မိမိလုပ်ဆောင်မယ့် လုပ်ငန်းအမျိုးအစားပေါ်မူတည်ပြီး ၁၃ သိန်းကျပ်အထိ အသေးစိပ် လုပ်ငန်းအစီအစဉ် ရေးဆွဲဖို့လည်း လိုအပ်ကြောင်း ဖော်ပြထားပါတယ်။
ထောက်ပံ့ငွေ ပေးရခြင်းရဲ့ ရည်ရွယ်ချက်ကလည်း ပဋိပက္ခဒဏ်ကို ခံနေရတဲ့လူထုတွေ ဝင်ငွေရရှိရေး၊ ပံ့ပိုးမှုတွေ ရဖို့၊ ပဋိပက္ခဒဏ် ခံရတဲ့လူထုတွေအတွက် အသေးစားငွေကြေးစီမံခန့်ခွဲမှု ဆိုင်ရာ အသိပညာရရှိလာစေဖို့နဲ့ သူတို့အတွက် ဝင်ငွေအခွင့်အလမ်းတွေ ရရှိလာစေဖို့၊ ပဋိပက္ခဒဏ်ခံစားရတဲ့လူထုတွေက မိမိကိုယ်ကို အားကိုးနိုင်မှုစွမ်းရည်မြင့်တင်လာစေဖို့ ဖြစ်တယ်လို့လည်း ဆိုပါတယ်။
