လွေးဇွန်မိုး၊ ဧပြီ ၅ ရက်၊ နမ့်ခမ်း
တအာင်းတပ်- TNLA ထိန်းချုပ်ထားတဲ့ ရှမ်းမြောက် နမ့်ခမ်းမြို့နယ် ကွန်လုံကျေးရွာမှာ ဝါယာကြိုး ရှော့ဖြစ်ရာကနေ နေအိမ်တစ်လုံး မီးလောင်ခဲ့တယ်လို့ သိရပါတယ်။
ဒီနေ့ ဧပြီ ၅ ရက် မနက် ၉ နာရီခွဲဝန်းကျင်မှာ လျှပ်စစ်ဝါယာကြိုး ရှော့ဖြစ်ရာကနေ မီး စလောင်ခဲ့တာဖြစ်ပြီး ၁၀ နာရီဝန်းကျင်မှာ မီးငြိမ်းသတ်နိုင်ခဲ့တယ်လို့ မီးငြိမ်းသတ်ရာမှာ ပါဝင်ခဲ့တဲ့ အမျိုးသားတစ်ဦးက ပြောပါတယ်။
“လျှပ်စစ်မီးကနေ လာတာပေါ့။ သူတို့ မီးကြိုး ရှော့ဖြစ်ပြီးတော့ အိမ် မီးလောင်သွားတာ။ လူထိတာတော့ မရှိဘူး။ သူတို့ရဲ့ အိမ်ထောင်စုနဲ့ မှတ်ပုံတင်တွေလည်း အကုန်ပါသွားတယ်”
နေအိမ်တစ်ခုလုံး မီးလောင်ပြာကျခဲ့ပြီး မီးလောင်မှုကြောင့် အိမ်ထောင်စု၊ မှတ်ပုံတင်၊ ငွေသား သိန်း ၅၀၊ ဆန် ၅ အိတ်၊ စပါးတစ်အိတ်၊ ပဲပုတ်စေ့ ၂၁ အိတ်နဲ့ လက်ဝတ်ရတနာတချို့လည်း ပါသွားခဲ့တယ်လို့ ဆိုပါတယ်။
အလားတူ မနေ့ ဧပြီ ၄ ရက် မနက် ၁၁ နာရီခွဲကျော်မှာလည်း ကွတ်ခိုင်မြို့ ရပ်ကွက်(၅) ရှမ်းဘုန်းကြီးကျောင်းအနီးရှိ နေအိမ်တစ်အိမ် မီးလောင်မှု ဖြစ်ပွားခဲ့ပါတယ်။
ရှမ်းမြောက် ကွတ်ခိုင်၊ မိုးမိတ်၊ ကျောက်မဲ စတဲ့မြို့နယ်တွေမှာ ပြီးခဲ့တဲ့ မတ်လအတွင်း မီးလောင်မှု ၆ ကြိမ် ဖြစ်ပွားခဲ့ပြီး ကျပ်သိန်းပေါင်း (၁,၄၀၀)ကျော် ဆုံးရှုံးခဲ့တယ်လို့ TNLA က ထုတ်ပြန်ထားပါတယ်။
