မိုင်းရူပ၊ ဧပြီ ၄ ရက်၊ သပိတ်ကျင်း
အပစ်ရပ်ဖို့ ကြေညာထားတဲ့ စစ်ကောင်စီတပ်ဟာ မန္တလေးတိုင်း သပိတ်ကျင်းမြို့နယ် ၇ မိုင်ရွာမှာ မြေပြင်ထိုးစစ် ဆက်လုပ်နေပြီး လေကြောင်း တိုက်ခိုက်မှု ဆက်လုပ်နေတယ်လို့ ရှေ့တန်း စစ်မြေပြင်မှာ ရှိနေသူတွေက ပြောပါတယ်။
မနေ့ ဧပြီ ၃ ရက် နေ့လယ် ၁၂ နာရီ ၄၀ မိနစ်မှာ စစ်တပ်ဟာ ၇ မိုင်ရွာကို ဂျက်ဖိုက်တာနဲ့ ဗုံး ၂ ကြိမ် ကြဲချတိုက်ခိုက်ခဲ့ပြီး တအာင်းတပ်မတော်- TNLA၊ မိုးကုတ်ဗျူဟာနဲ့ မန္တလေး PDF ပူးပေါင်းတပ် တည်ရှိရာကို ထိုးစစ်ဆင် တိုက်ခိုက်လာတယ်လို့ ဆိုပါတယ်။
“လေယာဥ်နဲ့ ၂ ကြိမ် လာကြဲတာ။ လေယာဥ်နဲ့ ကြဲပြီးတော့ မြေပြင်ကနေရော ထိုးစစ်လုပ်လာတာ။ လက်နက်ကြီး၊ ဒရုန်းနဲ့လည်း ဗုံးကြဲတာတွေ လုပ်နေတယ်” လို့ ၇ မိုင်တိုက်ပွဲမှာ ပါဝင်တိုက်ခိုက်နေတဲ့ တော်လှန်ရေး တပ်ဖွဲ့ဝင်တစ်ဦးက ရွှေဖီမြေကို ပြောပါတယ်။
မနေ့ တိုက်ပွဲမှာ နှစ်ဖက်တပ် အထိအခိုက် ရှိခဲ့ပြီး ဒီနေ့ ဧပြီ ၄ ရက် ၇ မိုင်မှာ တိုက်ပွဲ ဆက်လက် ဖြစ်ပွားနေတယ်လို့ သိရပါတယ်။
စစ်တပ်ဟာ ဧပြီ ၂ ရက်ကနေ ဧပြီ ၂၂ ရက်အထိ ၃ ပတ်ကြာ အပစ်ရပ်မယ်လို့ ကြေညာထားပေမဲ့ တော်လှန်ရေး အင်အားစုတွေထိန်းချုပ်ဒေသကို လေကြောင်းနဲ့ တိုက်ခိုက်တာ ထိုးစစ်ဆင်တာတွေ ပြုလုပ်နေပါတယ်။
ကချင်ပြည်နယ် ဝိုင်းမော်မြို့နယ်မှာလည်း မနေ့ ဧပြီ ၃ ရက်ကစလို့ စစ်တပ်ဘက်က ထိုးစစ်ဆင် တိုက်ခိုက်လာတာကြောင့် စစ်ကောင်စီတပ်နဲ့ ကချင်တပ်မတော်- KIA တို့အကြား တိုက်ပွဲ ပြင်းထန်နေပါတယ်။
ဒါ့အပြင် စစ်ကိုင်း၊ ကရင်နီနဲ့ ရှမ်းမြောက်ရှိ တော်လှန်ရေး အင်အားစုတွေ ထိန်းချုပ်ထားတဲ့ ဒေသတွေမှာလည်း လေကြောင်းတိုက်ခိုက်မှု ဆက်လက် လုပ်ဆောင်နေပါတယ်။
ငလျင်သင့်တဲ့ဒေသက လူထုတွေကို စာနာတဲ့အနေနဲ့ ညီနောင်မဟာမိတ် ၃ ဖွဲ့က ၁ လကြာ အပစ်ရပ်ထားပြီး KIA က ၃ ပတ်ကြာအပစ်ရပ်ထားကာ အမျိုးသား ညီညွတ်ရေးအစိုးရ- NUG က ၂ ပတ်ကြာ အပစ်ရပ်ထားတယ်လို့ ထုတ်ပြန်ထားကြပါတယ်။
