ရွှေဖီမြေ၊ ဧပြီ ၃ ရက်၊ မိုင်းကိုင်
ရှမ်းတောင် မိုင်းကိုင်မြို့နယ်အတွင်း ရှမ်းပြည် ပြန်လည်ထူထောင်ရေးကောင်စီ- RCSS/SSA ရဲ့ မိုင်းဆွဲတိုက်ခိုက်မှုကြောင့် အရပ်သား ၂ ဦး ထိခိုက်ဒဏ်ရာ ရခဲ့တယ်လို့ ရှမ်းပြည်တိုးတက်ရေးပါတီ- SSPP/SSA က ထုတ်ပြန်ထားပါတယ်။
ဖြစ်စဉ်ဟာ ပြီးခဲ့တဲ့ မတ်လ ၃၀ ရက် မနက် ၈ နာရီ ၁၅ မိနစ်က မိုင်းကိုင်မြို့နယ် ဝမ်ဟေ့ကျေးရွာဘက်လာတဲ့ အရပ်သား ကားတစ်စီးကို RCSS က မိုင်းဆွဲတိုက်ခိုက်ခဲ့တာကြောင့် အရပ်သား ၂ ဦး ဒဏ်ရာ ရခဲ့ပြီး ကားလည်း ပျက်စီးခဲ့တယ်လို့ SSPP က ထုတ်ပြန်ချက်ထဲ ထည့်သွင်းဖော်ပြထားပါတယ်။
မိုင်းဆွဲတိုက်ခိုက်ခံရမှုကြောင့် ဒဏ်ရာ ရခဲ့တဲ့ အရပ်သား ၂ ဦးကို SSPP ရဲ့ ကျန်းမာရေးဌာနက ဆေးကုသပေးခဲ့တယ်လို့ ဆိုပါတယ်။
RCSS ဟာ ပြီးခဲ့တဲ့ မတ်လ ၃၀ နဲ့ ၃၁ ရက်က မိုင်းကိုင်မြို့နယ် ပန်ကေတုနဲ့ ဝမ်ဟီးရွာကြားမှာ ကားစီးလာတဲ့ SSPP စစ်ကြောင်းကိုလည်း မိုင်းဆွဲတိုက်ခိုက်ခဲ့ဖူးတယ်လို့ ဆိုပါတယ်။
RCSS မိုင်းဆွဲတိုက်ခိုက်မှုကို အပစ်အခတ် ရပ်စဲထားတဲ့ သဘောတူညီချက်စာချုပ်အပေါ် ငဲ့ညာတဲ့အနေနဲ့ မတုန့်ပြန်သေးဘူးလို့ SSPP/SSA က ပြောဆိုပါတယ်။
SSPP ရဲ့ ထုတ်ပြန်ချက်ကို RCSS ဘက်ကတော့ ပြန်လည် တုန့်ပြန်ကာ ထုတ်ပြန်တာတော့ မရှိသေးပါဘူး။
ရှမ်းတောင်မှာ RCSS နဲ့ SSPP တို့ မကြာခဏ ပစ်ခတ်တာ မိုင်းဆွဲတိုက်ခိုက်တာတွေ ပြုလုပ်လေ့ရှိပြီး ပစ်ခတ်တိုက်ခိုက်မှုကြောင့် အရပ်သား ထိခိုက်မှုလည်း မကြာခဏ ဖြစ်ပွားလေ့ ရှိခဲ့ပါတယ်။
