မိုင်းရူပ၊ ဧပြီ ၁ ရက်၊ မိုးမိတ်
ရှမ်းမြောက် မိုးမိတ်မြို့မှာ စက်သုံးဆီတွေ တင်သွင်းလို့ မရသေးတာကြောင့် ပြတ်လပ်နေတယ်လို့ ဒေသခံတွေက ရွှေဖီမြေကို ပြောပါတယ်။
ငလျင်ဘေးဒဏ်ကြောင့် မန္တလေး၊ စစ်ကိုင်းဘက်ကနေ ဆီတင်သွင်းလို့ မရတော့ဘဲ ငလျင် မဖြစ်ခင်က ဓာတ်ဆီ တစ်လီတာကို ၆ ထောင်ဝန်းကျင် ရှိရာကနေ လက်ရှိမှာ ၁ သောင်းကျော်အထိ စျေးပေါက်နေတယ်လို့ ဆိုပါတယ်။
“တစ်မြို့လုံး လိုက်ပတ်ဝယ်တာ ၁ ဗူးလောက်ရရင် ကံကောင်းပြီ။ ၁ လီတာကို ၁ သောင်းကျော်နေပြီ။ ဝယ်ဖို့လည်း မရှိဘူး” လို့ မိုးမိတ်ဒေသခံတစ်ဦးက ရွှေဖီမြေကို ပြောပါတယ်။
အလားတူ မန္တလေးတိုင်း မိုးကုတ်မြို့မှာလည်း စက်သုံးဆီ လိုသလောက် ဝယ်ယူလို့ မရတော့ဘဲ ဆီတစ်လီတာကို ၁ သောင်းအထိ စျေး မြှင့်တက်လာတယ်လို့ ဒေသခံတွေက ပြောဆိုပါတယ်။
ငလျင် လှုပ်ခတ်မှုကြောင့် မန္တလေးမြို့အပါအဝင် စစ်ကိုင်း၊ နေပြည်တော်နဲ့ ရှမ်းတောင်မှာ အဆောက်အဦးတွေ ပျက်စီးခဲ့သလို လူပေါင်း ထောင်နဲ့ချီလည်း သေဆုံးခဲ့ပါတယ်။
ငလျင် လှုပ်ခတ်မှု စတင်ဖြစ်ပွားတဲ့ မတ်လ ၂၈ ရက်ကနေ မနေ့ မတ်လ ၃၁ ရက်အထိ နိုင်ငံတစ်ဝန်းမှာ ငလျင်ကြောင့် သေဆုံးသူ ၂,၀၅၆ ဦးနဲ့ ဒဏ်ရာရသူ ၃,၉၀၀ ဦးရှိပြီး ပျောက်ဆုံးနေသူ ၃၀၀ ရှိတယ်လို့ စစ်ကောင်စီက ထုတ်ပြန်ထားပါတယ်။
