ပို့လဘား၊ ဧပြီ ၁ ရက်၊ ညောင်ရွှေ
ရှမ်းတောင် ညောင်ရွှေမြို့နယ် ရေပူရွာကို စစ်ကောင်စီတပ်နဲ့ ၎င်းရဲ့ လက်အောက်ခံ ပအိုဝ်းပြည်သူ့စစ်- PNO က ဒရုန်း အသုံးပြုပြီး ဗုံးကြဲတိုက်ခိုက်ခဲ့တယ်လို့ အင်းလေးဒေသ လူ့အခွင့်အရေးအဖွဲ့က မနေ့ မတ်လ ၃၁ ရက်မှာ ထုတ်ပြန်ထားပါတယ်။
မနေ့ မတ်လ ၃၁ ရက်မှာ စစ်တပ်နဲ့ PNO တပ်ဖွဲ့ဟာ ရေပူရွာထဲ ဒရုန်း အသုံးပြုပြီး လက်နက်ကြီး ၈ လုံး ကြဲချတိုက်ခိုက်ခဲ့တာပဲ ဖြစ်ပါတယ်။
ညောင်ရွှေဒေသခံ အမျိုးသားတစ်ဦးက “မနက်ကတည်းက သူတို့ပစ်နေတာ။ ညနေ ၆ နာရီအထိ အသံကြားနေရတာပဲ။ အဲရွာက သူတို့ ဟိုတစ်လောက ရှောင်ကြတာ။ ဘယ်သူမှ မနေကြတော့ဘူး။ အိမ်တွေတော့ ထိတယ်ပြောကြတာပဲ” လို့ ပြောပါတယ်။
အင်းလေးဒေသက ကျေးရွာတချို့မှာ ငလျင်ဒဏ်ကြောင့် ဒုက္ခကြုံတွေ့နေရချိန်မှာ စစ်တပ်နဲ့ PNO က ပါဝင်ကူညီတာ မရှိဘဲ ဒရုန်းနဲ့ လက်နက်ကြီး ပစ်ခတ်တာတွေ လုပ်နေတယ်လို့ အဆိုပါ အမျိုးသားက ဆက်ပြောပါတယ်။
ပြီးခဲ့တဲ့ မတ်လ ၃၀ ရက်ကလည်း ညောင်ရွှေမြို့နယ် အင်းလေး တောင်ခြမ်းဘက်ရှိ ဘုရားတောင်ရွာကို စစ်တပ်နဲ့ PNO က လက်နက်ကြီး ၆ ကြိမ်ထက်မနည်း ပစ်ခတ်တိုက်ခိုက်လို့ နေအိမ်တစ်လုံး ထိခိုက်ပျက်စီးခဲ့ပါတယ်။
ဒါ့အပြင် ရှမ်းမြောက် နောင်ချိုမြို့နယ် ကျောက်ကြမ်းရွာကို မနေ့ မတ်လ ၃၁ ရက်မှာ စစ်တပ်က ဒရုန်း အသုံးပြုပြီး ဗုံးကြဲတိုက်ခိုက်ခဲ့သလို မန္တလေးတိုင်း စဉ့်ကူးမြို့ လက်ပံလှရွာကိုလည်း လေကြောင်း တိုက်ခိုက်မှု ပြုလုပ်ခဲ့ပါတယ်။
