လွေးထွေး၊ ဧပြီ ၁ ရက်၊ ပင်လုံ
ရှမ်းတောင် ပင်လုံမြို့က သင်္ဃန်းအရောင်းဆိုင်တစ်ခု မီးလောင်ရာကနေ အိမ်ရှင်မိသားစုဝင် ၃ ဦးလည်း သေဆုံးသွားကြောင်း ဖြစ်စဉ်သိရှိသူ ပင်လုံမြို့နေ အမျိုးသမီးတစ်ဦးက ရွှေဖီမြေကို ပြောပါတယ်။
ပင်လုံမြို့ ရပ်ကွက်(၁) ပညာတံခွန်လမ်းက သင်္ဃန်းအရောင်းဆိုင်ဟာ ဒီနေ့ ဧပြီ ၁ ရက် မနက် ၂ နာရီဝန်းကျင်ကနေ မနက် ၄ နာရီအထိ မီးလောင်ခဲ့ပြီး အိမ်ရှင်အမျိုးသမီး ၂ ဦးနဲ့ အမျိုးသား ၁ ဦး သေဆုံးသွားခဲ့တာလို့ ဆိုပါတယ်။
ပင်လုံမြို့နေ အမျိုးသမီးတစ်ဦးက “မီး စလောင်ကတည်းက ပတ်ဝန်းကျင်က ခေါ်နှိုးတယ်။ သူတို့ မကြားကြဘူးတဲ့။ သေတာအပြင် ဒဏ်ရာရသူလည်း ရှိတယ်။ အတိအကျတော့ မသိသေးဘူး။ မီးကလည်း ဘာကြောင့် လောင်လဲ မသိရဘူး” လို့ ပြောပါတယ်။
မီးလောင်မှု ဖြစ်ပွားခဲ့တဲ့နေရာကို လွိုင်လင်ခရိုင် မီးသတ်ကား ၃ စီး၊ ပင်လုံမြို့က မီးသတ်ကား ၂ စီးနဲ့ ဝိုင်းဝန်းမီးငြိမ်းသတ်ခဲ့တာဖြစ်ပြီး ဒီမနက် ၄ နာရီမှ အပြီးသတ် မီးငြိမ်းနိုင်ခဲ့တယ်လို့ ဆိုပါတယ်။
အလားတူ မနေ့ မတ်လ ၃၁ ရက်ကလည်း ကျောက်မဲမြို့နယ် မန်စန်းရွာမှာ မီးလောင်မှုဖြစ်လို့ နေအိမ် ၂ လုံး မီးလောင်ပျက်စီးခဲ့ပြီး ရွှေဖီမြေက ပြုစုထားတဲ့စာရင်းအရ မတ်လအတွင်း ရှမ်းမြောက်မှာ မီးလောင်မှု ၃ ကြိမ် ဖြစ်ပွားခဲ့ပါတယ်။
