အင်းငယ်၊ မတ်လ ၃၁ ရက်၊ အင်းလေး
ရှမ်းတောင် ညောင်ရွှေမြို့နယ် အင်းလေးဒေသမှာ ငလျင်ဒဏ်ကြောင့် အိမ်ထောင်စုပေါင်း ၃ ထောင်နီးပါးဟာ အရေးပေါ် အကူအညီ လိုအပ်နေတယ်လို့ ဒေသခံတွေက သတင်းပေးပို့လာပါတယ်။
မတ်လ ၂၈ ရက်က ၇.၇ ပြင်းအားရှိ မြေငလျင် လှုပ်ခတ်ခဲ့တာကြောင့် ပျက်စီးဆုံးရှုံးမှု များပြီး ကယ်ဆယ်ရေးနဲ့ အရေးပေါ် အကူအညီ လိုအပ်နေတာပဲ ဖြစ်ပါတယ်။
ကူညီဆောင်ရွက်ပေးနေသူ လူမှုကူညီရေး အသင်းဝင်တစ်ဦးက “အလောင်းတွေကတော့ အကုန်ထုတ်မရသေးဘူး။ သေတာကတော့ သေချာသလောက်ပါပဲ။ ရွှံ့နွံထဲ နစ်နေတာတွေက လူအားနဲ့ ဘယ်လိုမှ ထုတ်လို့မရဘူး။ စက်ပစ္စည်းပိုင်းကလည်း အကန့်အသတ် ရှိတယ်” လို့ ပြောပါတယ်။
လက်ရှိ အင်းလေးဒေသတွင်းမှာ စားနပ်ရိက္ခာနဲ့ ကယ်ဆယ်ရေး အထောက်အကူပစ္စည်းတွေ ဦးစားပေး လိုအပ်ပြီး Dead Body ထည့်တဲ့ အိတ်တွေလည်း ပြတ်လပ်နေတယ်လို့ ဆိုပါတယ်။
အကူအညီ လိုအပ်တဲ့ ရွာတွေဟာ ကေလာရွာ ၅ ရပ်ကွက်မှာ ၈၅၀ အိမ်၊ ဟဲယာရွာမ ၁၄ ရပ်ကွက်မှာ ၃၂၅ အိမ်၊ နန်းပန်မြို့ ၃ ရပ်ကွက်မှာ ၄၈၃ အိမ်၊ ရှေ့ဝကြီးရွာ ၁၁၅ အိမ်၊ အိမ်ထောင့်ကြီးရွာ ၂၅၀ အိမ်၊ မြောင်းဝကြီးရွာ ၈၅ အိမ်၊ အင်းခြံ ၂၅ အိမ်၊ သလဲဦးအင်းရွာ ၁၅၅ အိမ်၊ ညောင်ဝန်း ၁၅၈ အိမ်၊ ကြေးစားအုပ်စု ၃ ရွာပေါင်း ၃၀၇ အိမ်၊ ကန်ခေါင်း ၁၅ အိမ်၊ အင်းပေါခုံ ၂၀ အိမ်၊ ပွဲစားကုန်း ၂ အိမ်ဖြစ်ပြီး လက်လှမ်းမမှီသေးတဲ့ ကျေးရွာတွေမှာ အိမ်ထောင်စု ထောင်နဲ့ချီ ကျန်ရှိနေသေးတယ်လို့ သိရပါတယ်။
ငလျင်ဒဏ်သင့် ကြေးစားကုန်း ဒေသခံတစ်ဦးက “ကျမတို့ မြောက်ရွာကတော့ ဘုန်းကြီးကျောင်း၊ စာသင်ကျောင်းတွေမှာ စုနေကြတယ်။ ထပ်ပြိုရင်တော့ မတတ်နိုင်ဘူး။ အကူအညီလည်း ဘယ်သူမှ မလာသေးဘူး” လို့ ပြောပါတယ်။
အင်းလေးဒေသတွင်း ကုန်းမြေရှိတဲ့ ကျေးရွာတွေက ကွင်းပြင်မှာ တဲထိုးကာ နေထိုင်ကြပြီး ရေပြင်ပေါ်က ရွာတွေကတော့ ရေခြံတွင်းမှာ တဲထိုး နေထိုင်တာ၊ လှေပေါ်မှာ အိပ်တာတွေ ပြုလုပ်နေကြတယ်လို့ ကေလာရွာအတွင်း ကူညီဆောင်ရွက်ပေးနေသူတွေက ပြောပါတယ်။
အင်းလေးဒေသတွင်း ငလျင်ဒဏ်ကြောင့် သေဆုံးသူထဲ ၄၁ ဦးနဲ့ ကေလာရွာက အများဆုံးဖြစ်ပြီး အဲဒီထဲမှာ မွေးကင်းစကလေး၊ မသန်စွမ်းနဲ့ သက်ကြီးရွယ်အိုအားလုံးနီးပါး ပါဝင်တယ်လို့ စုံစမ်းသိရှိရပါတယ်။
