ယာရူစိင်၊ မတ်လ ၃၁ ရက်၊ တံတားဦး
မန္တလေးတိုင်း တံတားဦးမြို့နယ်မှာ ငလျင် လှုပ်ခတ်ခဲ့တာကြောင့် သေဆုံးသူ ၁၂၀ ကျော်အထိ ရှိလာပြီး ကယ်ဆယ်ရေးအဖွဲ့တွေ လာရောက် ကူညီပေးဖို့ကိုလည်း ဒေသခံတွေက တောင်းဆိုနေပါတယ်။
တံတားဦးမှာ ပြီးခဲ့တဲ့ မတ်လ ၂၈ ရက်ကနေ ဒီနေ့ မတ်လ ၃၁ ရက်အထိ ဘယ်ကယ်ဆယ်ရေးအဖွဲ့မှ လာရောက် ကူညီပေးတာမျိုး မရှိသေးဘူးလို့ ဒေသခံတွေက ရွှေဖီမြေကို ပြောပါတယ်။
“ဘာအကူအညီမှ တံတားဦးဘက်ကို မလာပါဘူး။ မြို့ကလူတွေအချင်းချင်းပဲ ကူညီဝိုင်းဝန်းနေကြရတာပါ။ အသေအပျောက်များတဲ့နေရာကို အရင်ဖော်နေကြပါတယ်။ နေအိမ်တွေလည်း ပျက်စီးတာ အရမ်းများတယ်။ မြို့ရဲ့ တစ်ဝက်လောက် ပျက်စီးသွားပါတယ်။ မြို့သေးမလို့ ကယ်ဆယ်ရေးတွေ မလာတာလား မသိပါဘူး။ အခုချိန်ထိ အသေအပျောက်တွေ အရမ်းများနေပါတယ်။ အရေးပေါ် အကူအညီလည်း ဘာမှမရတော့ ဒုက္ခရောက်နေတာပေါ့။ ဘာအကူအညီမှ မပေးရင်တောင် ရေနဲ့ စားစရာတွေတော့ ကူညီပေးပါလို့ တောင်းဆိုချင်ပါတယ်” ဆိုပြီး တံတားဦးမြို့နေ အမျိုးသားတစ်ဦးက ပြောပါတယ်။
မတ်လ ၂၈ ရက်က လှုပ်ခတ်ခဲ့တဲ့ ငလျင်ကြောင့် တံတားဦးမြို့မှာလည်း အဆောက်အဦးနဲ့ စေတီတွေ ပြိုကျမှု ရှိသလို လူထိခိုက်မှုနဲ့ သေဆုံးမှုတွေလည်း ရှိနေသေးကြောင်း သိရပါတယ်။
မတ်လ ၂၈ ရက် နေ့လယ် ၁ နာရီဝန်းကျင်မှာ မန္တလေးမြို့အရှေ့မြောက်ဘက် ၁၂ မိုင်အကွာကို ဗဟိုပြုပြီး လှုပ်ခတ်ခဲ့တဲ့ ငလျင်ကြောင့် မန္တလေးတိုင်းမှာ ထိခိုက်သေဆုံးမှုများပြီး နေပြည်တော်၊ စစ်ကိုင်းတိုင်းနဲ့ ရှမ်းတောင်လည်း ထိခိုက်သေဆုံးမှု များနေပြီးတော့ သေဆုံးမှု ဆက်လက် မြှင့်တက်နေပါတယ်။
မန္တလေးတိုင်းမှာ ထိခိုက်သေဆုံးမှု အများဆုံးဖြစ်ပြီး မနေ့ မတ်လ ၃၀ ရက်အထိ ငလျင်ဒဏ်ကြောင့် နိုင်ငံတစ်ဝန်းမှာ ထိခိုက်သေဆုံးသူရဲ့ အလောင်း ၂ ထောင်ကျော်တွေ့ရှိထားပြီး ဒီနေ့မှာလည်း သေဆုံးသူတွေရဲ့ အလောင်းတွေကို ဆက်လက် ရှာဖွေနေဆဲလို့ သိရပါတယ်။
