ယာရူစိင်၊ မတ်လ ၃၁ ရက်၊ ချမ်းမြသာစည်
ငလျင် လှုပ်ခတ်မှုကြောင့် မန္တလေးတိုင်း ချမ်းမြသာစည်မြို့နယ် ၁၅-၁၆ လမ်းကြား နှင်းဆီခြံ ဗလီဝင်းထဲက ၇ လွှာတိုက် ပြိုကျခဲ့ပြီး လက်ရှိအချိန်ထိ အယောက် ၄၀ ပိတ်မိနေဆဲဖြစ်ကြောင်း ဒေသခံတွေက ရွှေဖီမြေကို ပြောပါတယ်။
ဒီနေ့ မတ်လ ၃၁ ရက်အထိ အသက်ရှင်သူ ၃ ယောက်သာ တွေ့ရပြီး ကယ်ဆယ်ရေးအင်အား လုံလောက်မှု မရှိဘူးလို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
“မနေ့မှ ဒီတိုက်ဘက်ကို ကယ်ဆယ်ရေးတွေ လာတာပါ။ ၇ လွှာတိုက်ထဲက အပေါ်ဆုံးအလွှာမှာ နေတဲ့သူ ၃ ယောက်ပဲ အသက်ရှင်လျက် တွေ့သေးတယ်။ သေဆုံးစာရင်းတော့ အတိအကျ မသိရပါဘူး။ ဒါပေမဲ့ အထဲမှာ အယောက် ၄၀ ပိတ်မိနေသေးတာတော့ သေချာတယ်။ ကယ်ဆယ်ရေးတွေလဲ အရမ်းပင်ပန်းနေပြီလေ။ သုံးရက်ဆက်တိုက် ရှာဖွေပေးနေရတာဆိုတော့”
မတ်လ ၂၈ ရက် နေ့လယ် ၁ နာရီဝန်းကျင်မှာ မန္တလေးမြို့အရှေ့မြောက်ဘက် ၁၂ မိုင်အကွာကို ဗဟိုပြုပြီး လှုပ်ခတ်ခဲ့တဲ့ ငလျင်ကြောင့် မန္တလေးတိုင်းမှာ ထိခိုက်သေဆုံးမှုများပြီး နေပြည်တော်၊ စစ်ကိုင်းတိုင်းနဲ့ ရှမ်းတောင်လည်း ထိခိုက်သေဆုံးမှု များနေပြီးတော့ သေဆုံးမှုတွေ ဆက်လက် မြှင့်တက်နေပါတယ်။
ငလျင် လှုပ်ခတ်မှုဟာ မန္တလေးတိုင်းနဲ့ စစ်ကိုင်းတိုင်းကို ဗဟိုပြု လှုပ်ခတ်ခဲ့တာကြောင့် ထိခိုက်ပျက်စီးမှု သေဆုံးမှု အများဆုံးရှိပြီး စစ်ကိုင်းတိုင်းဘက်မှာလည်း ကယ်ဆယ်ရေး အားနည်းနေသလို စစ်ကောင်စီဘက်က ပိတ်ပင်တားဆီးနေတာလည်း ကြုံတွေ့နေရတယ်လို့ ဒေသခံတွေက ပြောပါတယ်။
