ရွှေဖီမြေ၊ မတ်လ ၃၀ ရက်
မြန်မာနိုင်ငံအတွင်း နေရာတချို့မှာ ငလျင်ဘေးသင့် လူထုတွေကို ကူညီဖို့ ကိုယ်စွမ်းဥာဏ်စွမ်း တတ်နိုင်သလောက် ပါဝင်ကူညီသွားမယ်လို့ ဒီနေ့ မတ်လ ၃၀ ရက်မှာ KNU က ထုတ်ပြန်လာပါတယ်။
ကူညီကယ်ဆယ်ရေးနဲ့ ကူညီပေးတာတွေကငလျင်ဒဏ်ကို မြေပြင်မှာ ကြုံတွေ့ခံစားနေရသူတွေဆီ ရောက်ရှိအောင် ဆောင်ရွက်ပေးဖို့ကိုလည်း နိုင်ငံတကာကို KNU က တိုက်တွန်းထားပါတယ်။
၂၀၀၈ နာဂစ်မုန်တိုင်း ဖြစ်စဥ်တုန်းကလည်း နိုင်ငံတကာက ပေးအပ်တဲ့ အကူအညီဟာ စစ်အုပ်စုကသာ ကိုယ်ကျိုးခံစားခွင့်အတွက် အသုံးပြုတာကြောင့် ဒီအချိန်မှာလည်း ၎င်းဖြစ်စဉ်မျိုး ထပ်မဖြစ်အောင် အနီးကပ်အမြဲတမ်း စောင့်ကြည့်ဖို့လိုကြောင်း ပြောဆိုထားပါတယ်။
သေဆုံးဒဏ်ရာရသူ၊ အဆောက်အဦး ပြိုကျပျက်စီးခဲ့ရသူနဲ့အတူ ဝမ်းနည်းကြောင်းလည်း ထည့်သွင်းရေးသားထားပါတယ်။
ဒီနေ့ မတ်လ ၃၀ ရက် နေ့လယ် ၁၂ နာရီအထိ ငလျင်ကြောင့် သေဆုံးသူ ၂,၀၂၈ ဦး ရှိပြီဖြစ်ကြောင်း DVB ရဲ့ အချက်အလက်အရ သိရပါတယ်။
မတ်လ ၂၈ ရက် နေ့လယ် ၁ နာရီဝန်းကျင်က ပြင်းအား ၇.၇ ရှိတဲ့ ငလျင် လှုပ်ခတ်ခဲ့တာကြောင့် မန္တလေး၊ စစ်ကိုင်းနဲ့ ရှမ်းတောင် စတဲ့မြို့နယ်က စေတီပုထိုး၊ ဘုရားကျောင်း၊ လူနေအိမ်အပြင် လူထုတွေလည်း သေဆုံးတာတွေ ရှိနေတာကြောင့် ပြည်တွင်းပရဟိတသမားအပြင် ပြည်ပက ကယ်ဆယ်ရေးသမားကလည်း ကယ်ဆယ်ဖို့အတွက် ရောက်ရှိနေကြတာ ဖြစ်ပါတယ်။
အလားတူ မနေ့ မတ်လ ၂၉ ရက်ကလည်း တအာင်းနိုင်ငံရေး အတိုင်ပင်ခံ ကော်မတီ- TPCC ကလည်း နိုင်ငံတကာရဲ့ အကူအညီတွေ စစ်ကောင်စီက အဟန့်အတားကင်းပြီး ကူညီပံ့ပိုးနိုင်ကြဖို့ လူထုတွေနဲ့အတူ တစ်သားတည်း ရပ်တည်ကြောင်း ထုတ်ပြန်ထားပါတယ်။
