လွေးထွေး၊ မတ်လ ၃၀ ရက်၊ မိုးကုတ်
ငလျင်ဒဏ် အပြင်းအထန် ခံစားနေရချိန် စစ်ကောင်စီကို ထောက်ခံတဲ့ Telegram လော်ဘီချန်နယ်တွေမှာတော့ တအာင်းတပ်- TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ကို ဗုံးကြဲဖို့ လှုံ့ဆော်နေတာကို တွေ့နေရပါတယ်။
မနေ့ မတ်လ ၂၉ ရက်မှာ စစ်ကောင်စီတပ်ကို ထောက်ခံတဲ့ လော်ဘီချန်နယ်ဖြစ်တဲ့ Kyaw Swar တယ်လီဂရမ်ချန်နယ်အပြင် တခြားစစ်ကောင်စီ လော်ဘီချန်နယ်ကလည်း မိုးကုတ်မှာ TNLA, AA, MNDAA တို့က ပူးပေါင်းပြီး ရွှေ တူးနေတာကြောင့် ဗုံးကြဲဖို့ လှုံ့ဆော်ထားတာ ဖြစ်ပါတယ်။
“မိုးကုတ်ဂေါက်ကွင်းမှာ ရွှေတူးနေပါတယ်။ တွေ့သမျှ ဘတ်ဖိုးတွေကို Y12 နဲ့ ဗုံးကြဲပေးပါ” လို့ ရေးသားထားပါတယ်။
မိုးကုတ်မြို့ကို ပြီးခဲ့တဲ့ ဖေဖော်ဝါရီ ၁၀ ရက် ကတည်းက စစ်တပ် ဗုံးကြဲပြီးနောက် ၎င်းနေရာမှာ ရွှေတူးဖော်မှု ရပ်နားထားကြောင်း မိုးကုတ်မြို့ရှိ သတင်းအရင်းအမြစ်တစ်ဦးက ပြောဆိုပါတယ်။
“အရင်က ဂေါက်ကွင်းမှာ တူးနေကြတာတော့ ဟုတ်တယ်။ အဲလို စက်တွေနဲ့ တူးတာက ရပ်ထားတာ ကြာပြီ။ အခုက မရှိဘူးလားဆိုတော့ ရှိတယ်။ ဒေသခံတွေ တစ်နိုင်တစ်ပိုင်လေးတွေပေါ့။ ဘယ်အဖွဲ့အစည်းကမှ တူးတာ မတွေ့မိဘူး”
ဒါ့အပြင် မန္တလေးနဲ့ စစ်ကိုင်းတိုင်း နေရာတချို့မှာ စစ်တပ်က ငလျင်ဒဏ်သင့်သူတွေကို ကူညီကယ်ဆယ်ရေး မလုပ်ပေးတဲ့အပြင် ကယ်ဆယ်ရေးတချို့ကိုလည်း တားမြစ်ပိတ်ပင်တာ ရှိနေတယ်လို့ မြေပြင်သတင်းအရင်းအမြစ်တွေက ပြောပါတယ်။
အလားတူ ပြီးခဲ့တဲ့ မတ်လ ၂၈ ရက် နေ့လယ် ၁ နာရီဝန်းကျင်က ငလျင် လှုပ်ခတ်ချိန်မှာ စစ်တပ်က နောင်ချိုမြို့နယ် နောင်လင်ရွာကို ဂျက်ဖိုက်တာ ၃ စီး နဲ့ ဗုံးကြဲတိုက်ခိုက်ခဲ့တာကြောင့် ဓနုတပ်ဖွဲ့မှ စစ်မေ ၆ ဦးနဲ့ တပ်သား ၁ ဦး ကျဆုံးခဲ့ပါတယ်။
