မိုင်းရူပ၊ မတ်လ ၂၉ ရက်၊ မန္တလေး
မန္တလေးမြို့ရှိ ဥလှသိန်းဗိမ္မာန်မှာ ငလျင် လှုပ်ခတ်မှုကြောင့် ဓမ္မစရိယစာမေးပွဲ ဖြေဆိုနေတဲ့ သံဃာတော် အပါး ၈၀ ထက်မနည်း ပျံလွန်တော်မူသွားတယ်လို့ ရွှေဖီမြေက စုံစမ်းသိရှိရပါတယ်။
မနေ့ မတ်လ ၂၈ ရက် နေ့လယ် ၁ နာရီဝန်းကျင်က ငလျင် လှုပ်ခတ်မှုအတွင်း ဥလှသိန်းဗိမ္မာန်မှာ ဓမ္မစရိယစာမေးပွဲ ဖြေဆိုနေတဲ့ သံဃာတော်အပါး ၆၀၀ ကျော်ထဲက အပါး ၈၀ ပျံလွန်တော်မူခဲ့တာပဲ ဖြစ်ပါတယ်။
“ဓမ္မစရိယစာမေးပွဲ ဖြေနေကြတာ။ အဲမှာက အပါး ၆၀၀ ကျော်လောက် ရှိတယ်။ ပြိုတဲ့အဆောက်အဦးက သံဃာတော် အပါး ၂၀၀ ကျော်လောက် ရှိတယ်။ မနက်အထိ ပျံလွန်တော်မူတာ ၈၀ လောက် ရှိတယ်လို့ သိရတယ်” လို့ မန္တလေးမြို့မှာ ရှိနေတဲ့ ဦးဇင်းတစ်ပါးက ရွှေဖီမြေကို မိန့်ပါတယ်။
လက်ရှိအချိန်ထိ ကယ်ဆယ်ရေးတွေ ဆက်လုပ်နေပြီး မန္တလေးမြို့ရှိ မစိုးရိမ် စာသင်တိုက်ရဲ့ အဆောက်အဦးလည်း ငလျင် လှုပ်ခတ်မှုကြောင့် အထက်မြင့်တိုက် ပြိုကျသွားတယ်လို့ အထက်ပါ ဦးဇင်းက ဆက်မိန့်ပါတယ်။
မန္တလေးမြို့မှာ ငလျင် လှုပ်ခတ်မှု ဖြစ်ပွားပြီးနောက် နေရာတချို့မှာ ဆက်သွယ်ရေးလိုင်း ပြတ်တောက်နေပါတယ်။
မနေ့ ငလျင် လှုပ်ခတ်မှုမှာ မန္တလေးတိုင်းဟာ ပျက်စီးဆုံးရှုံးမှု အများဆုံးဖြစ်ပြီး သေဆုံးသူ အယောက် ၈၀၀ ကျော် ရှိလာပြီလို့ သိရပါတယ်။
ဒီနေ့ မတ်လ ၂၉ ရက် မနက်ပိုင်းအထိ စစ်ကောင်စီ ထုတ်ပြန်ချက်အရ မန္တလေးတိုင်းမှာ သေဆုံးသူ ၈၃၈ ဦး၊ ဒဏ်ရာရရှိသူ ၁,၆၇၀ ဦး၊ ပျောက်ဆုံးနေသူ ၆၈ ဦး ရှိနေပြီး သေဆုံးသူရဲ့ စာရင်းတွေကို ဆက်လက်ကောက်ယူနေပြီးတော့ အရေအတွက် ထပ်တိုးလာနိုင်ပါတယ်။
ဒီနေ့မနက်ပိုင်းအထိ နိုင်ငံတစ်ဝန်းမှာ ငလျင် လှုပ်ခတ်မှုကြောင့် သေဆုံးသူ ၁,၀၀၂ ဦးနဲ့ ဒဏ်ရာရသူ ၂,၃၇၆ ဦး ရှိလာပြီလို့ စစ်ကောင်စီက ပြောဆိုထားပါတယ်။
