ပျားကြီး၊ မတ်လ ၂၉ ရက်၊ မန္တလေး
အင်အားပြင်းတဲ့ ငလျင်ဒဏ်ကြောင့် မန္တလေးမြို့မှာ သေဆုံးသူ ၈၀၀ ကျော်အထိရှိလာပြီး အေးရိပ်ငြိမ်သုဿန်မှာ အလောင်း စုပုံနေတယ်လို့ ဒေသခံ ပရဟိတသမားတွေက ရွှေဖီမြေကို ပြောပါတယ်။
မနေ့ နေ့လယ်ပိုင်းမှာ လှုပ်ခတ်ခဲ့တဲ့ ငလျင်ဒဏ်ကြောင့် မန္တလေးမြို့က အဆောက်အဦးပေါင်း ရာနဲ့ချီ ပြိုကျခဲ့ပြီး အသက်ဆုံးရှုံးမှုလည်း ထောင်နဲ့ချီ ရှိနေတာ ဖြစ်ပါတယ်။
“အခုထိ စာရင်းက ချုပ်လို့ မရသေးဘူး။ တချို့ DB(ရုပ်အလောင်း)တွေဆိုရင် သွားမကောက်နိုင်သေးဘူး။ အခုထိဆိုရင် သိသလောက်က ၈၀၀ ကျော်ပြီ။ ဒါအနည်းဆုံးပဲ။ မြေပြင်မှာက ဒီထက် ပိုများမယ်” လို့ အသက် ၄၀ အရွယ် ဒေသခံ ပရဟိတသမားတစ်ဦးက ပြောပါတယ်။
အဆောက်အဦး ပြိုကျမှုကြောင့် သေဆုံးသူ များခဲ့တဲ့အတွက် ဒီနေ့မနက်ပိုင်းကစပြီး ပုသိမ်ကြီးမြို့နယ်က အေးရိပ်ငြိမ်သုဿန်နဲ့ အမရပူရမြို့နယ်က တောင်အင်းမြောက်အင်းသုဿန်ဘက် အလောင်း ပို့ဆောင်ပေးနေရတယ်လို့ ပရဟိတသမားတွေက ပြောပါတယ်။
အလောင်းတွေ များတာကြောင့် လမ်းမပေါ်မှာ နာရေးကား တန်းစီမောင်းနှင်နေရပြီး အေးရိပ်ငြိမ်သုဿန်မှာလည်း အလောင်းပေါင်း ၂၀၀ ကျော် စုပြုံနေတာ မြင်တွေ့ခဲ့ရပါတယ်။
ငလျင်အခြေအနေကြောင့် သိန်းနဲ့ချီတဲ့ ဒေသခံတွေဟာ နေအိမ်တွေထဲ ဆက်လက် နေထိုင်မှု မရှိတော့ဘဲ လမ်းပေါ်မှာပဲရာသီဥတု ပူပြင်းတဲ့ကြားက ၂၄ နာရီ ကြာတဲ့အထိ နေထိုင်နေကြရဆဲ ဖြစ်ပါတယ်။
